Rialacha iompraíochta iomchuí 

Staonfaidh na Feisirí d’aon chineál ciaptha síceolaí nó gnéis agus urramóidh siad an Cód Iompair Iomchuí d’Fheisirí de Pharlaimint na hEorpa i bhfeidhmiú a gcuid dualgas (féach Riail 10 (6) de na Rialacha Nós Imeachta).

Féachann an Cód Iompair Iomchuí d’Fheisirí de Pharlaimint na hEorpa lena áirithiú go gcaitheann feisirí le gach duine a oibríonn i bParlaimint na hEorpa le dínit, cúirtéis agus urraim agus gan réamhchlaonadh ná idirdhealú.

Agus an méid sin á dhéanamh acu, bítear ag súil leis go ndéanann na Feisirí iad féin a iompar ar bhealach proifisiúnta agus go staonann siad, ina gcaidreamh leis an bhfoireann, ó ísliú, maslú nó teanga idirdhealaitheach nó aon ghníomhaíochtaí eile atá mí-eiticiúil, dímheasúil nó neamhdhleathach.

Tá an Cód Iompair Iomchuí i gceangal le Rialacha Nós Imeachta na Parlaiminte (Iarscríbhinn II).

Ar dhul i mbun oifig leis an bParlaimint, ceanglaítear ar gach feisire dearbhú a shíniú ag deimhniú a thiomantais nó a tiomantais chun an Cód a chomhlíonadh.

Ní fhéadfar Feisirí nár shínigh an dearbhú sin a thoghadh mar shealbhóirí oifige de chuid na Parlaiminte nó dá cuid comhlachtaí, ná ní fhéadfar iad a cheapadh mar rapóirtéir ná ní fhéadfaidh siad a bheith rannpháirteach i dtoscaireacht oifigiúil nó i gcaibidlíocht idirinstitiúideach. Foilseofar gach dearbhú, bíodh sé sínithe nó ná bíodh, ar leathanaigh phróifíle na bhFeisirí ar shuíomh gréasáin na Parlaiminte. Ós rud é nach féidir sínithe na bhFeisirí a fhoilsiú ar an suíomh gréasáin, ciallaíonn dáta a bheith ar dhearbhú gur síníodh é an lá sin.

Leagtar amach mar threoirphrionsabail sa Chód Iompair d’Fheisirí maidir le macántacht agus trédhearcacht, go ngníomhóidh Feisirí ar son leas an phobail, agus leas an phobail amháin, agus go seolfaidh siad a gcuid oibre le neamh-fhéinchúis, macántacht, oscailteacht, dúthracht, ionracas, cuntasacht agus meas ar dhínit agus ar chlú Pharlaimint na hEorpa.

Sainítear sa Chód Iompair coinbhleachtaí leasa agus an bealach ar cheart do na Feisirí dul i ngleic leo, lena n-áirítear an oibleagáid atá ar Fheisirí dearbhú mionsonraithe maidir lena leasanna príobháideacha, dearbhú sócmhainní agus, i gcás inarb infheidhme, dearbhú maidir le feasacht ar choinbhleachtaí leasa a thíolacadh agus a láithreacht ag imeachtaí arna n-eagrú ag tríú páirtithe a dhearbhú, chomh maith le haon bhronntanais a fhaightear i gcáil oifigiúil ag a bhfuil garluach ar mó é ná EUR 150.

Anuas air sin, cuireann an Cód Iompair oibleagáid ar Fheisirí a gcruinnithe sceidealaithe ar fad le hionadaithe sainleasa a thagann faoi raon feidhme an Chláir Trédhearcachta agus le hionadaithe údarás poiblí de chuid tíortha nach tíortha den Aontas Eorpach iad a fhoilsiú, agus nuair a dhéantar na cruinnithe sin a tharmligean chuig a gcúntóirí.

Féadfaidh an tUachtarán pionós a ghearradh ar aon fheisire a fhaightear a bheith ag sárú an Chóid Iompair. Déanann an tUachtarán an pionós sin a fhógairt le linn suí iomlánach agus foilsítear é ar shuíomh gréasáin na Parlaiminte.

Tuilleadh faisnéise:   Rialacha Nós Imeachta: Riail 11 - Rialacha iompair maidir le macántacht agus trédhearcacht

Ní mór do státseirbhísigh Eorpacha cloí le tacar rialacha i gcomhlíonadh a ndualgas gairmiúil, le linn dóibh a bheith san oifig agus tar éis dóibh an tseirbhís a fhágáil. Leagtar na rialacha sin amach sna rialacháin foirne, sa Chód Iompair a ghlac Biúró Pharlaimint na hEorpa, agus ceanglaítear fúthu go mbeadh an fhoireann go léir neamhspleách, faichilleach, discréideach agus dílis.

Tá na hoibleagáidí ginearálta sin ann chun coimirciú a dhéanamh ar na gníomhaíochtaí agus ar chlú AE agus a fhoirne, agus bíonn siad i bhfeidhm le linn fheidhmiú dhualgais na foirne agus lasmuigh den obair chomh maith.

Ciallaíonn sé sin, i ndáil le leas ar bith i ngnó nó eagraíocht ar bith a d’fhéadfadh urraim na n-oibleagáidí sin a chur i mbaol, nach mór é a dhearbhú ar bhonn láithreach. Ní mór gníomhaíochtaí seachtracha, íoctha nó neamhíoctha, a chumhdaítear leis na rialacha sin a fhormheas roimh ré.

Níl cead ag foireann na Parlaimint glacadh le bronntanais nó garanna ó thríú páirtithe gan cead a fháil roimh ré, ach amháin má tá luach an bhronntanais níos lú ná €100 nó níos lú ná €300 thar thréimhse bliana.

Ar deireadh, nuair a fhágann ball foirne, ní mór dó nó di an Pharlaimint a chur ar an eolas má sé beartaithe aige nó aici dul i mbun aon chineál gníomhaíochta íoctha nó neamhíoctha.

Maidir le hiompar iomchuí le grúpaí stocaireachta, tabhair cuairt ar ár leathanach maidir le trédhearcacht agus grúpaí stocaireachta.