Anders Celsius var ein svensk astronom, geodet og geofysikar som er mest kjend for å ha bidrege til opprettinga av celsius-temperaturskalaen.
Anders Celsius blei fødd inn i ein akademikarfamilie der både far, farfar og morfar var astronomar. Han viste svært tidleg anlegg for matematikk. I 1730 blei han professor i astronomi ved Uppsala universitet, berre 29 år gammal.
Frå 1732 budde Celsius nokre år i Tyskland, Italia og Frankrike. Han var opphavsmann til, og deltakar i, den franske gradmålingsekspedisjonen til Lappland, som saman med ein liknande ein til Peru, fastslo at Jorda er flattrykt ved polane. I samtida fekk forskinga hans på nordlys stor anerkjenning i Europa.
Celsius føreslo i 1741 ein temperaturskala med 0 gradar ved kokepunktet for reint vatn og 100 gradar ved frysepunktet. Den svenske botanikaren Carl von Linné og instrumentmakaren Daniel Ekström (1711–1755) valde å snu skalaen. Denne skalaen er i dag kjend som celsius-temperaturskalaen og blir brukt internasjonalt.
I 1742 innretta Celsius Sveriges første astronomiske observatorium i Uppsala, utstyrt med instrument han hadde kjøpt inn på reiser i Europa. Han utarbeidde ein forskingsplan for det nye observatoriet, men rakk aldri å gjennomføre planen, då han døydde tidleg av tuberkulose.