Alderney

Alderney
Luftfoto av Alderney
Geografi
Stad	Den engelske kanalen
Koordinatar	49°42′52″N 2°12′19″W
Øygruppe	Kanaløyane
Areal	7,8 km²
Lengd	4,8 km
Breidd	2,4 km
Administrasjon
Land	Storbritannia
Demografi
Folketal	2400
Folketettleik	308 /km²

Alderney (fransk Aurigny; auregnais Aoeur'gny) er den nordlegaste av Kanaløyane og underlagt Storbritannia. Ho er ein del av Guernsey bailiwick. Øya er 4,8 km lang og 2,4 km brei med eit areal på 7,8 km². Ho er dermed den tredje største av Kanaløyane. Øya ligg kring 15 km vest for La Hague på Cotentinhalvøya i Normandie i Frankrike, 30 km nordaust for Guernsey og 100 km frå sørkysten av England. Ho er den av Kanaløyane som ligg nærast både Frankrike og England. Mellom Cap de la Hague og øya ligg det farlege Race of Alderney (Le Raz).

Øya har kring 2400 innbyggjarar som vert kalla vaques etter kyrne her, eller lapins etter dei mange kaninane på øya. Det einaste soknet på øya er St. Anne som dekkjer heile øya.

Øya vert styrt av eit parlament kalla States of Alderney, som består av ein president og 10 medlemmar som vert valde kvart fjerde år. Presidenten leiar dei månadlege møta til parlamentet. Alderney har òg to seter med stemmerett i parlamentet til Guernsey.

Den daglege administrasjonen av øya vert utført av tre komitéar – Plan- og finanskomitéen, Forvaltningskomitéen og Bygnings- og utviklingskomitéen – som vert støtta av eit lite embetsverk. Skattepolitikken er Guernsey sitt område, og parlamentet til Guernsey har derfor ansvar for å gjere tilstrekkelege ressursar tilgjengeleg for styresmaktene på Alderney.

Alderney sitt rettsapparat omfattar éin domstol – Court of Alderney. Neste instans er den kongelege domstolen i Guernsey, og så ankedomstolen til Kanaløyane. Siste instans er Juridisk komité ved Det kongelege rådet.

Bakgrunnsstoff

Reiseguide for Alderney frå Wikivoyage

• Offisiell nettstad
• Språk på Alderney Arkivert 2008-04-15 ved Wayback Machine.
• Festninga Alderney Arkivert 2008-08-21 ved Wayback Machine.
• Alderney Wildlife Trust
• Turistinformasjon

Kjelder

• Denne artikkelen bygger på «Alderney» frå Wikipedia på engelsk, og «Alderney» frå Wikipedia på bokmål den 4. februar 2010.
  • Wikipedia på engelsk oppgav desse kjeldene: