Աննա Լենա Էլգստրյոմ

Աննա Լենա Էլգստրյոմ
Ծնվել է	դեկտեմբերի 29, 1884
Ծննդավայր	Helsingborgs Maria church parish, Հելսինգբորգ, Մալմյոհուս համայնք, Շվեդիա
Վախճանվել է	դեկտեմբերի 23, 1968 (83 տարեկան)
Վախճանի վայր	S:t Görans church parish, Ստոկհոլմ, Ստոկհոլմի լեն, Շվեդիա
Գերեզման	Հյուսիսային գերեզմանատուն
Մասնագիտություն	թարգմանչուհի և գրող
Լեզու	շվեդերեն
Քաղաքացիություն	Շվեդիա
Ամուսին	Gustaf Collijn?
Զավակներ	Ragnhild Billig?
	Anna Lenah Elgström Վիքիպահեստում

Աննա Հելենա Մարիա (Աննա Լենա) Էլգստրյոմ (շվեդ.՝ Anna Helena Maria (Anna Lenah) Elgström, դեկտեմբերի 29, 1884(1884-12-29)^[1], Helsingborgs Maria church parish, Հելսինգբորգ, Մալմյոհուս համայնք, Շվեդիա - դեկտեմբերի 23, 1968(1968-12-23)^[1], S:t Görans church parish, Ստոկհոլմ, Ստոկհոլմի լեն, Շվեդիա), շվեդ գրող, լրագրող և խաղաղության համար պայքարող։

Կենսագրություն և ստեղծագործականություն

Աննա Լենա Էլգստրյոմը ծնվել է 1884 թվականին, Հելսինգբորգում։ Վաղ տարիքում ցանկացել է նկարչուհի դառնալ և ընդունվել է Ստոկհոլմի տեխնիկական դպրոց (Tekniska skolan): 1908 թվականին իր եղբոր հետ մեկնել է Փարիզ, որտեղ շարունակել է ուսումը, նաև` ստեղծել է խճանկարներ և նկարներ ապակու վրա։ Նույն տարիներին նա սկսել է գրել. նախ դրանք եղել են ճամփորդական նշումներ, որոնք Փարիզից նա ուղարկել է շվեդական տարբեր թերթերի։ 1912 թվականին Աննա Լենա Էլգստրյոմն ամուսնացել է թատերական գործիչ Գուստաֆ Կոլիյնի հետ, իսկ երկու տարի անց դուստր է ունեցել^[3]:

Աննա Լենա Էլգստրյոմի գրական դեբյուտը կայացել է 1911 թվականին, երբ լույս է տեսել նրա «Gäster och främlingar» գիրքը, որը քննադատների կողմից դրական արձագանքներ է ստացել։ Նրա ամենահայտնի գործերից մեկը Էլս Հոլմի մասին «Den kloka Elsa» եռագրությունն է, որը պատմում է աղջկանից երիտասարդ կին դառնալու աստիճանական փոխակերպման մասին^[3]:

Առաջին համաշխարհային պատերազմի տարիներին Աննա Լենան հիմնականում զբաղվել է լրագրությամբ՝ արմատական պացիֆիստի դիրքորոշում ունենալով։ 1915 թվականին նա մասնակցել է Հաագայում Կանանց խաղաղության և ազատության միջազգային կոնգրեսին, 1916 թվականին՝ Ստոկհոլմում խաղաղության հարցերի վերաբերյալ կոնֆերանսին^[4] ^[3]: Նրա համար օրինակ է եղել խաղաղության համար հայտնի պայքարող Ռոզիկա Շվիմմերը։ 1917 թվականին Աննա Լենան Էլին Վագների և Ֆրիդա Սթենհոֆի հետ գրել է իրեն նվիրված «Den kinesiska muren. Rosika Schwimmers kamp för rätten och hennes krig mot kriget» գիրքը։ Նույն թվականին նա դարձել է Մարդասիրական քաղաքականության ասոցիացիայի (Förbundet för humanistisk politik) համահիմնադիրը։ Էլգստրյոմի պացիֆիզմը սերտորեն կապված էր ֆեմինիզմի հետ` Էլեն Քեյի ոգով։ Նա շատ է գրել պատերազմի ժամանակ մայրերի և երեխաների անպաշտպանության մասին, ովքեր ստիպված էին տառապել տղամարդկանց մեղքով։ Այս թեմային է նվիրված նրա` պատմվածքների «Mödrar» ժողովածուն, որն առաջին անգամ լույս է տեսել 1917 թվականին, այնուհետև բազմիցս վերահրատարակվել է։ 1919 թվականին գրողը դարձել է Rädda Barnen կազմակերպության հիմնադիրներից մեկը («Փրկենք երեխաներին »)^[3]:

1930-ականների կեսերին, գտնվելով Իսպանիայում և քաղաքացիական պատերազմի մասին ռեպորտաժներ վարելով` Էլգստրյոմը որոշակիորեն փոխել է իր հայացքները՝ թույլ տալով բռնության և ռազմական գործողությունների անխուսափելիությունը որոշակի հանգամանքներում։ 1936 թվականին նա կազմակերպել է Շվեդիայի կանանց կոմիտեն` իսպանացի երեխաների համար (Svenska Kvinnokommittén för Spaniens barn), որի նախագահն է եղել 1936-1940 թվականներին։ Երկրորդ համաշխարհային պատերազմի սկզբում Էլգստրյոմն օգնել է Ֆինլանդիային, իսկ 1940 թվականին՝ փախստականների օգնության հանձնաժողովի անդամ էր^[3]:

Աննա Լենա Էլգստրյոմը շատ է ճանապարհորդել՝ այցելելով, մասնավորապես, Եվրոպայի տարբեր երկրներ, ԱՄՆ, Աֆրիկա և Խորհրդային Միություն։ Որպես լրագրող նա համագործակցել է այնպիսի պարբերականների հետ, ինչպիսիք են Social-Demokraten, Morgon-Tidningen և Sydsvenska Dagbladet Snällposten պարբերականները։ Նրան հետաքրքրող ևս մեկ թեման կրոնն էր։ Նա մեծացել է քրիստոնեական ընտանիքում, որը հարում էր ռիվայվելիզմի գաղափարներին (նրա մայրական զարմիկը Լինա Սանդել-Բերգն էր), իսկ 1948 թվականին կաթոլիկություն է ընդունել և համագործակցել կաթոլիկ Credo ամսագրի հետ^[3]:

Ընդհանուր առմամբ, Աննա Լենա Էլգստրյոմը գրել է երեսուն վեպ, պատմվածքների, էսսեների և ճամփորդական գրառումների ժողովածուներ։ Աննան մահացել է 1968 թվականին։ Նրա պատվին անվանակոչվել է Էրեբրու քաղաքի փողոցներից մեկը ^[3]:

Ծանոթագրություններ

↑ ^1,0 ^1,1 ^1,2 ^1,3 ^1,4 Bibliothèque nationale de France data.bnf.fr (ֆր.): տվյալների բաց շտեմարան — 2011.
↑ Collijn, ANNA HELENA MARIA — Svenskagravar.se.
↑ ^3,0 ^3,1 ^3,2 ^3,3 ^3,4 ^3,5 ^3,6 Svenskt kvinnobiografiskt lexikon
↑ The History of Nordic Women's Literature

Վիքիպահեստն ունի նյութեր, որոնք վերաբերում են «Աննա Լենա Էլգստրյոմ» հոդվածին։

[_0c15eb77485f1824-1] 1,0 ^1,1 ^1,2 ^1,3 ^1,4 Bibliothèque nationale de France data.bnf.fr (ֆր.): տվյալների բաց շտեմարան — 2011.

[_f9d1830fe38200b7-2] Collijn, ANNA HELENA MARIA — Svenskagravar.se.

[Svenskt_kvinnobiografiskt_lexikon———-3] 3,0 ^3,1 ^3,2 ^3,3 ^3,4 ^3,5 ^3,6 Svenskt kvinnobiografiskt lexikon

[The_History_of_Nordic_Women's_Literature———-4] The History of Nordic Women's Literature

[1]

[2]

[3]

[4]