César Rodríguez Álvarez

César Rodríguez Álvarez

Nome orixinal	(es) César Rodríguez
Biografía
Nacemento	29 de xuño de 1920 León, España
Morte	1 de marzo de 1995 (74 anos) Barcelona (España)
Actividade
Ocupación	futbolista, adestrador de fútbol
Período de actividade	3 de decembro de 1939 -
Deporte	fútbol
Posición de xogo	Dianteiro
Traxectoria   Equipo –   Real Betis Balompié 1939–1955   FC Barcelona 287 (190) 1940–1942 → cesión:    Granada CF 24 (23) 1954–1955   Cultural Leonesa 15 (3) 1955–1955 → cesión:  Club Deportivo Condal 9 (8) 1955–1956   Cultural Leonesa 15 (3) 1956–1957 Canet Roussillon Football Club 13 (4) 1957–1960   Elche CF 80 (42)   Selección nacional 1943–1954   Cataluña 10 (5) 1945–1952   España 12 (6)   Adestrador –   Real Betis Balompié
Participou en
1950	Mundial de Fútbol Brasil 1950
Familia
Irmáns	Ricardo Rodríguez Álvarez

César Rodríguez Álvarez, nado en León o 29 de xuño de 1920 e finado en Barcelona o 1 de marzo de 1995, foi un futbolista e adestrador de fútbol español. Xogaba de dianteiro e foi internacional coa selección española. Desenvolveu a maior parte da súa carreira no Barcelona, club do que foi o máximo goleador histórico durante máis de medio século, ata que os seus 232 goles foron superados en 2012 por Leo Messi.

Era irmán do tamén futbolista Ricardo Rodríguez Álvarez.

Traxectoria

Como xogador

Formouse no Frente de Juventudes de León e no ano 1939 fichou polo FC Barcelona pero este cederíao a mediados da primeira tempada ao CE Sabadell e os dous anos seguintes o Granada CF xa que tiña que cumprir o servizo militar en dita cidade, con ese equipo chegou a proclamarse campión de Segunda División e a xogar en Primeira.

Unha vez de volta en Barcelona fíxose cun posto de titular, que mantería durante trece tempadas, nas que marcou 232 goles e gañou trece títulos, entre Ligas, Copas do Xeneralísimo, Copas Eva Duarte e Copas Latinas. Tamén se proclamou Pichichi co club catalán na tempada 1948/49.

Deixou o Barcelona no ano 1955 e tras xogar na Cultural Leonesa e no Perpignan retirouse xogando no Elche CF, sendo na última tempada xogador-adestrador, e subindo ao equipo dende a Terceira División a Primeira en só tres anos e proclamándose campión de Terceira e Segunda División.

Coa Selección de fútbol de España disputou un total de 13 encontros entre os anos 1945 e 1952, marcando seis goles e participando no Mundial de Fútbol Brasil 1950 e no Mundial de Fútbol Suíza 1954.

As súas cifras anotadoras levárono a ser o máximo goleador do FC Barcelona en encontros oficiais ata o 20 de marzo de 2012 cando o superou o arxentino Lionel Messi.

Como adestrador

Tras o grande éxito co Elche CF a quen deixou en Primeira División fichou polo Real Zaragoza para aos tres anos dirixir ao FC Barcelona. De aí pasaría ao RCD Mallorca en 1965 con quen descendería a Segunda, polo que deixa o equipo para fichar polo Celta de Vigo. En Vigo supliría a Rafael Yunta que deixara o equipo a tempada anterior, pero non remataría a tempada sendo substituído por Pepe Villar.

En 1967 ficha polo Real Betis Balompié pero tampouco tería sorte e o equipo descendeu a finais da tempada. O seu último equipo en Primeira sería outra vez o Real Zaragoza a quen dirixiu un ano.

En Segunda División pasou por Mallorca e Hércules CF antes de retirarse no UE Sant Andreu.

Palmarés

Como xogador

Barcelona

• Primeira División (5): 1944/45, 1947/48, 1948/49, 1951/52, 1952/53.
• Copa do Xeneralísimo (3): 1951, 1952, 1953.
• Copa Eva Duarte (3): 1948, 1952, 1953.
• Copa Latina (2): 1949, 1952.

Granada

• Segunda División (1): 1940/41.

Elche

• Segunda División (1): 1958/59.
• Terceira División (1): 1957/58.

Individual

• Trofeo Pichichi (1): 1948/49

Como adestrador

Hércules

• Terceira División (1): 1969/70.