Yle Sápmi muitalii miessemánu loahpas, ahte searvedoaimmaide lea váttis fidnet olbmuid. Ovdamearkka dihte Oulu Sámit -searvi lei juo vihkkehallamin heaittihit doaimmas, go ledje hástalusat gávdnat ságajođiheaddji.
Searvi goittotge basttii joatkkit doaimmas, go fidnejedje ođđa ságadoalli jahkečoahkkimisttis geassemánu álggus. Searvvi jođihišgoahtá Sigga-Marja Magga.
Oulu Sámit leage sutnje erenomáš oahpis, go lea leamašan mielde vuođđudeamen searvvi 2000-logu álgojagiin. Son leamaš maiddái ovdal searvvi ságadoallin.
– Orui, ahte lea suddu jus searvvi doaibma nohká. Munnje áigi lei láddan, sáhtán fas geahččalit stivret dán.
Sigga-Marja Magga deattuha sámeservviid mearkkašumi báikkálaš guvlui.
– Mu mielas galgá leat sámesearvi dáppe Oulus ja eará gávpogiin maid. Mii leat dáppe leahkimin sápmelaččaid váras, oažžut leat ovttas ja doallat oktavuođa gávpogii. Mii leat ožžon earret eará sámegielat beaiveruovttu ja oahpahusa, lohká Magga.
Sámi Siida: Lea stuorra hástalus gávdnat aktiivvalaš stivrralahtuid
Ohcejoga sámesearvi Sámi Siida lea maid válljen dál ođđa stivrra. Stivrra ságadoallin válljejuvvui Sámmol Ánde Lukkari. Son álggaha searvvi ságadoallin goalmmat baji.
Su mielde maiddái Sámi Siida šattai ráhčat dan ovdii, ahte gávdnošedje olbmot stivrii fásta láhtun.
– Mii leat bures fidnen olbmuid geassit mánáid ja nuoraid rieggáid, ja ovdal leat fidnen bures maiddái stivrii olbmuid, muhto dál fertii geavahit dasa áiggi.
– Lea stuorra hástalus gávdnat aktiivva stivrra, muitala Lukkari.
Oulu Sámit ja Sámi Siida ožžo Sámedikkis doaibmadoarjaga. Oulu Sámit -searvi mearridii máksit čoahkkinbálkkáid, ja jahkebálkká ságadoallái ja čállái.
Sámi Siida máksá čállái ja ságadoallái gollobuvttadusa, dego telefon- dahje printengoluid. Lukkari mielas bálkkámáksin dahje goluid buvttadeapmi orru leamen buorre vuohki oažžut olbmuid fárrui searvedoaimmaide.
– Orru, ahte loahpaloahpas dat lea áidna goansta oažžut olbmuid fárrui. Eaktodáhtolaččat orru máŋgasii váttis. Muhto galhan ságadoallái ja čállái dat golut leat duođalaččat.
Dievasmahttojuvvon 16.6.2020 dii. 7:48: Sámmol Lukkari álggaha goalmmat baji Sámi Siidda ságadoallin.