

MOTIVATIONAL SHAYARI
Life would be lusterless and shorn of meaning if there was no motivation. Motivation keeps us going and makes life
meaningful and worth living. We have made a selection of motivational poetry that fill us with positive spirit and
inspire us to live life enthusiastically.

 SHER 121 GHAZAL 13 HINDI GHAZAL 1 HUMOUR/SATIRE 1 NAZM 4 QITA 

ā.īn-e-javāñ-mardāñ haq-goī o be-bākī

allāh ke sheroñ ko aatī nahīñ rūbāhī

ALLAMA IQBAL

 Tag: hausla

ābād agar na dil ho to barbād kījiye

gulshan na ban sake to bayābāñ banā.iye

JIGAR MORADABADI



āstāñ bhī koī mil jā.egā ai zauq-e-niyāz

sar salāmat hai to sajda bhī adā ho jā.egā

 JIGAR BARELVI



ab havā.eñ hī kareñgī raushnī kā faisla

jis diye meñ jaan hogī vo diyā rah jā.egā

MAHSHAR BADAYUNI

 Tag: hausla

abhī se paañv ke chhāle na dekho

abhī yaaro safar kī ibtidā hai

EJAZ RAHMANI

 Tag: hausla

ai mauj-e-balā un ko bhī zarā do chaar thapeḌe halke se

kuchh log abhī tak sāhil se tūfāñ kā nazāra karte haiñ

MOIN AHSAN JAZBI


 ai 'zauq' takalluf meñ hai taklīf sarāsar

ārām meñ hai vo jo takalluf nahīñ kartā

SHEIKH IBRAHIM ZAUQ

 Tag: mashwara

'aḳhtar' guzarte lamhoñ kī aahaT pe yuuñ na chauñk

is mātamī julūs meñ ik zindagī bhī hai

AKHTAR HOSHIYARPURI

 Tags: aahat and 1 more

apnā zamāna aap banāte haiñ ahl-e-dil

ham vo nahīñ ki jin ko zamāna banā gayā

JIGAR MORADABADI

 Tag: hausla

'attār' ho 'rūmī' ho 'rāzī' ho 'ġhazālī' ho

kuchh haath nahīñ aatā be-āh-e-sahar-gāhī

ALLAMA IQBAL
 

aur bhī dukh haiñ zamāne meñ mohabbat ke sivā

rāhateñ aur bhī haiñ vasl kī rāhat ke sivā

FAIZ AHMAD FAIZ

 Tags: famous shayari and 6 more

baḌh ke tūfān ko āġhosh meñ le le apnī

Dūbne vaale tire haath se sāhil to gayā

ABDUL HAMID ADAM

 Tag: hausla

baare duniyā meñ raho ġham-zada yā shaad raho

aisā kuchh kar ke chalo yaañ ki bahut yaad raho

MIR TAQI MIR

 Tag: mashwara

bachchoñ ke chhoTe hāthoñ ko chāñd sitāre chhūne do

 chaar kitābeñ paḌh kar ye bhī ham jaise ho jā.eñge

NIDA FAZLI

 Tag: bachpan

bhañvar se laḌo tund lahroñ se uljho

kahāñ tak chaloge kināre kināre

RAZA HAMDANI

 Tags: hausla and 1 more

chāhiye ḳhud pe yaqīn-e-kāmil

hausla kis kā baḌhātā hai koī

SHAKEEL BADAYUNI



chalā jaatā huuñ hañstā kheltā mauj-e-havādis se

agar āsāniyāñ hoñ zindagī dushvār ho jaa.e

ASGHAR GONDVI


chale chaliye ki chalnā hī dalīl-e-kāmrānī hai

jo thak kar baiTh jaate haiñ vo manzil pā nahīñ sakte

HAFEEZ BANARASI



charāġh-e-rāhguzar laakh tābnāk sahī

jalā ke apnā diyā raushnī makān meñ lā

AKBAR HYDERABADI



daulat-e-duniyā nahīñ jaane kī hargiz tere saath

baad tere sab yahīñ ai be-ḳhabar baT jā.egī

BAHADUR SHAH ZAFAR



dekh zindāñ se pare rañg-e-chaman josh-e-bahār

raqs karnā hai to phir paañv kī zanjīr na dekh

MAJROOH SULTANPURI


 Tag: hausla

DhūñD ujḌe hue logoñ meñ vafā ke motī

ye ḳhazāne tujhe mumkin hai ḳharāboñ meñ mileñ

AHMAD FARAZ

 Tags: famous shayari and 1 more

dhuup meñ niklo ghaTāoñ meñ nahā kar dekho

zindagī kyā hai kitāboñ ko haTā kar dekho

NIDA FAZLI

 Tags: kitab and 1 more

dil nā-umīd to nahīñ nākām hī to hai

lambī hai ġham kī shaam magar shaam hī to hai

FAIZ AHMAD FAIZ

 Tags: dil and 2 more

dushmanī jam kar karo lekin ye gunjā.ish rahe

 jab kabhī ham dost ho jaa.eñ to sharminda na hoñ

BASHIR BADR

 Tags: dost and 2 more

dushmanī kā safar ik qadam do qadam

tum bhī thak jāoge ham bhī thak jā.eñge

BASHIR BADR

 Tag: dushmani

dushmanī laakh sahī ḳhatm na kiije rishta

dil mile yā na mile haath milāte rahiye

NIDA FAZLI

 Tags: dushmani and 2 more

ek ho jaa.eñ to ban sakte haiñ ḳhurshīd-e-mubīñ

varna in bikhre hue tāroñ se kyā kaam bane

ABUL MUJAHID ZAHID

 Tags: famous shayari and 1 more

 farāġhat se duniyā meñ har dam na baiTho

agar chāhte ho farāġhat ziyāda

ALTAF HUSSAIN HALI

 Tag: mashwara

ġharībī amīrī hai qismat kā saudā

milo aadmī kī tarah aadmī se

HAIRAT GONDVI



ghar se masjid hai bahut duur chalo yuuñ kar leñ

kisī rote hue bachche ko hañsāyā jaa.e

NIDA FAZLI

 Tags: famous shayari and 1 more

go aable haiñ paañv meñ phir bhī ai rahravo

manzil kī justujū hai to jaarī rahe safar

NOOR QURESHI


 Tags: hausla and 1 more

ġhulāmī meñ na kaam aatī haiñ shamshīreñ na tadbīreñ

jo ho zauq-e-yaqīñ paidā to kaT jaatī haiñ zanjīreñ

ALLAMA IQBAL



gumshudgī hī asl meñ yaaro rāh-numā.ī kartī hai

raah dikhāne vaale pahle barsoñ raah bhaTakte haiñ

HAFEEZ BANARASI



haañ samundar meñ utar lekin ubharne kī bhī soch

Dūbne se pahle gahrā.ī kā andāza lagā

ARSH SIDDIQUI

 Tag: mashwara

'hafīz' apnī bolī mohabbat kī bolī

 na urdu na hindī na hindostānī

HAFEEZ JALANDHARI

 Tags: mohabbat and 1 more

ham ko miTā sake ye zamāne meñ dam nahīñ

ham se zamāna ḳhud hai zamāne se ham nahīñ

JIGAR MORADABADI

 Tags: famous shayari and 2 more

ham parvarish-e-lauh-o-qalam karte raheñge

jo dil pe guzartī hai raqam karte raheñge

FAIZ AHMAD FAIZ

 Tags: hausla and 1 more

har ek baat ko chup-chāp kyuuñ sunā jaa.e

kabhī to hausla kar ke nahīñ kahā jaa.e

NIDA FAZLI


 har musībat kā diyā ek tabassum se javāb

is tarah gardish-e-daurāñ ko rulāyā maiñ ne

FANI BADAYUNI



hayāt le ke chalo kā.enāt le ke chalo

chalo to saare zamāne ko saath le ke chalo

MAKHDOOM MOHIUDDIN

 Tag: mashwara

hazār barq gire laakh āñdhiyāñ uTTheñ

vo phuul khil ke raheñge jo khilne vaale haiñ

SAHIR LUDHIANVI

 Tag: hausla

ho na māyūs ḳhudā se 'bismil'

ye bure din bhī guzar jā.eñge

BISMIL AZIMABADI
 

in añdheroñ se pare is shab-e-ġham se aage

ik na.ī sub.h bhī hai shām-e-alam se aage

ISHRAT QADRI



inhī ġham kī ghaTāoñ se ḳhushī kā chāñd niklegā

añdherī raat ke parde meñ din kī raushnī bhī hai

AKHTAR SHIRANI

 Tag: hausla

itnā bhī nā-umīd dil-e-kam-nazar na ho

mumkin nahīñ ki shām-e-alam kī sahar na ho

NARESH KUMAR SHAD

 Tag: ummeed

itnā sach bol ki hoñToñ kā tabassum na bujhe

 raushnī ḳhatm na kar aage añdherā hogā

NIDA FAZLI

 Tag: sach

ittifāq apnī jagah ḳhush-qismatī apnī jagah

ḳhud banātā hai jahāñ meñ aadmī apnī jagah

ANWAR SHUOOR



jaada jaada chhoḌ jaao apnī yādoñ ke nuqūsh

aane vaale kārvāñ ke rahnumā ban kar chalo

UNKNOWN

 Tag: farewell

jahāñ rahegā vahīñ raushnī luTā.egā

kisī charāġh kā apnā makāñ nahīñ hotā

WASEEM BARELVI

 Tags: charagh and 1 more

 jalāne vaale jalāte hī haiñ charāġh āḳhir

ye kyā kahā ki havā tez hai zamāne kī

JAMEEL MAZHARI

 Tags: hausla and 1 more

jo tūfānoñ meñ palte jā rahe haiñ

vahī duniyā badalte jā rahe haiñ

JIGAR MORADABADI

 Tags: hausla and 1 more

'kaif' paidā kar samundar kī tarah

vus.ateñ ḳhāmoshiyāñ gahrā.iyāñ

KAIF BHOPALI

 Tag: motivational

kaise ākāsh meñ sūrāḳh nahīñ ho saktā

ek patthar to tabī.at se uchhālo yaaro

DUSHYANT KUMAR


 Tags: famous shayari and 1 more

kapḌe safed dho ke jo pahne to kyā huā

dhonā vahī jo dil kī siyāhī ko dhoiye

SHAIKH ZAHURUDDIN HATIM

 Tags: dil and 1 more

kashtiyāñ sab kī kināre pe pahuñch jaatī haiñ

nāḳhudā jin kā nahīñ un kā ḳhudā hotā hai

BEDAM SHAH WARSI

 Tags: khuda and 1 more

ḳhair se rahtā hai raushan nām-e-nek

hashr tak jaltā hai nekī kā charāġh

ZAHEER DEHLVI

 Tag: motivational

ḳhudī ko kar buland itnā ki har taqdīr se pahle

 ḳhudā bande se ḳhud pūchhe batā terī razā kyā hai

ALLAMA IQBAL

 Tags: famous shayari and 3 more

kināre hī se tūfāñ kā tamāshā dekhne vaale

kināre se kabhī andāza-e-tūfāñ nahīñ hotā

JAGAN NATH AZAD

 Tag: motivational

kisī ko be-sabab shohrat nahīñ miltī hai ai 'vāhid'

unhīñ ke naam haiñ duniyā meñ jin ke kaam achchhe haiñ

WAHID PREMI

 Tags: motivational and 1 more

kisū mashrab meñ aur maz.hab meñ

zulm ai mehrbāñ nahīñ hai durust

SHAIKH ZAHURUDDIN HATIM

 Tag: motivational

 koī ik zā.iqa nahīñ miltā

ġham meñ shāmil ḳhushī sī rahtī hai

GHULAM MURTAZA RAHI

 Tags: gham and 1 more

koshish bhī kar umiid bhī rakh rāsta bhī chun

phir is ke ba.ad thoḌā muqaddar talāsh kar

NIDA FAZLI

 Tag: motivational

lakīreñ khīñchte rahne se ban ga.ī tasvīr

koī bhī kaam ho, be-kār thoḌī hotā hai

KHALID MOIN

 Tag: motivational

log chun leñ jis kī tahrīreñ havāloñ ke liye

zindagī kī vo kitāb-e-mo'tabar ho jā.iye

ABUL MUJAHID ZAHID


 Tag: motivational

log jis haal meñ marne kī duā karte haiñ

maiñ ne us haal meñ jiine kī qasam khaa.ī hai

AMEER QAZALBASH

 Tags: hausla and 1 more

log kahte haiñ badaltā hai zamāna sab ko

mard vo haiñ jo zamāne ko badal dete haiñ

AKBAR ALLAHABADI

 Tags: hausla and 1 more

māzī-e-marhūm kī nākāmiyoñ kā zikr chhoḌ

zindagī kī fursat-e-bāqī se koī kaam le

SEEMAB AKBARABADI

 Tags: mazi and 1 more

maiñ akelā hī chalā thā jānib-e-manzil magar

 log saath aate ga.e aur kārvāñ bantā gayā

MAJROOH SULTANPURI

 Tags: famous shayari and 6 more

manzileñ na bhūleñge rāh-rau bhaTakne se

shauq ko ta.alluq hī kab hai paañv thakne se

ADEEB SAHARANPURI

 Tag: motivational

mat baiTh āshiyāñ meñ paroñ ko sameT kar

kar hausla kushāda fazā meñ uḌaan kā

MAHFUZUR RAHMAN ADIL

 Tag: motivational

maujoñ kī siyāsat se māyūs na ho 'fānī'

girdāb kī har tah meñ sāhil nazar aatā hai

FANI BADAYUNI

 Tags: hausla and 2 more

 mire junūñ kā natīja zarūr niklegā

isī siyāh samundar se nuur niklegā

AMEER QAZALBASH

 Tags: motivational and 1 more

mire nāḳhudā na ghabrā ye nazar hai apnī apnī

tire sāmne hai tūfāñ mire sāmne kinārā

FAROOQ BANSPARI

 Tag: motivational

mizāj alag sahī ham donoñ kyuuñ alag hoñ ki haiñ

sarāb o aab meñ poshīda qurbateñ kyā kyā

FUZAIL JAFRI

 Tag: motivational

mushkil kā sāmnā ho to himmat na hāriye

himmat hai shart sāhib-e-himmat se kyā na ho

IMDAD IMAM ASAR


 Tag: motivational

musībat kā pahāḌ āḳhir kisī din kaT hī jā.egā

mujhe sar maar kar teshe se mar jaanā nahīñ aatā

YAGANA CHANGEZI

 Tags: hausla and 1 more

na ham-safar na kisī ham-nashīñ se niklegā

hamāre paañv kā kāñTā hamīñ se niklegā

RAHAT INDORI

 Tags: kanta and 1 more

na thī haal kī jab hameñ apne ḳhabar rahe dekhte auroñ ke aib o hunar

paḌī apnī burā.iyoñ par jo nazar to nigāh meñ koī burā na rahā

BAHADUR SHAH ZAFAR

 Tag: motivational

naaz kyā is pe jo badlā hai zamāne ne tumheñ

 mard haiñ vo jo zamāne ko badal dete haiñ

AKBAR ALLAHABADI

 Tag: motivational

nahīñ hai nā-umīd 'iqbāl' apnī kisht-e-vīrāñ se

zarā nam ho to ye miTTī bahut zarḳhez hai saaqī

ALLAMA IQBAL

 Tags: famous shayari and 1 more

nahīñ terā nasheman qasr-e-sultānī ke gumbad par

tū shāhīñ hai baserā kar pahāḌoñ kī chaTānoñ meñ

ALLAMA IQBAL

 Tags: hausla and 1 more

nasheman par nasheman is qadar ta.amīr kartā jā

ki bijlī girte girte aap ḳhud be-zār ho jaa.e

UNKNOWN

 Tags: hausla and 1 more

 nigah buland suḳhan dil-navāz jaañ pur-soz

yahī hai raḳht-e-safar mīr-e-kārvāñ ke liye

ALLAMA IQBAL

 Tags: motivational and 1 more

nikal jā aql se aage ki ye nuur

charāġh-e-rāh hai manzil nahīñ hai

ALLAMA IQBAL

 Tags: ilm and 2 more

paidā vo baat kar ki tujhe ro.eñ dūsre

ronā ḳhud apne haal pe ye zaar zaar kyā

AZIZ LAKHNAVI

 Tags: mashwara and 1 more

parinda jānib-e-dāna hamesha uḌ ke aatā hai

parinde kī taraf uḌ kar kabhī daana nahīñ aatā

ADEEM HASHMI


 Tags: motivational and 1 more

phuul kar le nibāh kāñToñ se

aadmī hī na aadmī se mile

KHUMAR BARABANKAVI

 Tags: insaan and 3 more

pyāso raho na dasht meñ bārish ke muntazir

maaro zamīñ pe paañv ki paanī nikal paḌe

IQBAL SAJID

 Tag: motivational

qatra na ho to bahr na aa.e vajūd meñ

paanī kī ek buuñd samundar se kam nahīñ

JUNAID HAZIN LARI

 Tag: motivational

rañj se ḳhūgar huā insāñ to miT jaatā hai rañj

 mushkileñ mujh par paḌīñ itnī ki āsāñ ho ga.iiñ

MIRZA GHALIB

 Tag: motivational

rāsta sochte rahne se kidhar bantā hai

sar meñ saudā ho to dīvār meñ dar bantā hai

JALEEL 'AALI'

 Tag: motivational

raat ko jiit to paatā nahīñ lekin ye charāġh

kam se kam raat kā nuqsān bahut kartā hai

IRFAN SIDDIQI

 Tags: charagh and 2 more

sāhil ke sukūñ se kise inkār hai lekin

tūfān se laḌne meñ mazā aur hī kuchh hai

AAL-E-AHMAD SUROOR

 Tags: hausla and 1 more

 saare patthar nahīñ hote haiñ malāmat kā nishāñ

vo bhī patthar hai jo manzil kā nishāñ detā hai

PARVEZ AKHTAR

 Tag: motivational

saat sandūqoñ meñ bhar kar dafn kar do nafrateñ

aaj insāñ ko mohabbat kī zarūrat hai bahut

BASHIR BADR

 Tags: mohabbat and 2 more

sadā ek hī ruḳh nahīñ naav chaltī

chalo tum udhar ko havā ho jidhar kī

ALTAF HUSSAIN HALI

 Tags: hausla and 1 more

sailāb-e-zindagī ke sahāre baḌhe chalo

sāhil pe rahne vāloñ kā nām-o-nishāñ nahīñ

BAQAR MEHDI


 Tag: motivational

shah-zor apne zor meñ girtā hai misl-e-barq

vo tifl kyā giregā jo ghuTnoñ ke bal chale

MIRZA AZEEM BEG 'AZEEM'

 Tags: filmi shayari and 3 more

sham.a māshūqoñ ko sikhlātī hai tarz-e-āshiqī

jal ke parvāne se pahle bujh ke parvāne ke ba.ad

JALEEL MANIKPURI

 Tags: motivational and 1 more

SPECIAL SECTION
ANNUAL OF URDU STUDIES

All volumes of published articles, translations and views of scholars of Urdu humanities.

ILM-E-AROOZ

Ilm-e-Arooz is the Urdu counterpart of prosody used to determine principles of metric pattern in Urdu
poetry.

ZIA MOHIUDDIN
 Zia Mohiuddin has taken the art of recitation to unprecedented heights of excellence .

M I R Z A G H A L I B : G H A L I B I YA AT

Rare and complete collection of poetry ever written by the legendary Mirza Ghalib

100 FAMOUS GHAZALS

Presents 100 of the highly-admired and widely-read ghazals at one place.

TOP SELECTION
100 FAMOUS GHAZALS

Presents 100 of the highly-admired and widely-read ghazals at one place.

T- 2 0 S H AYA R I

Read a collection of Top 20 sher by Faiz Ahmad Faiz

T- 2 0 S H AYA R I

Read a collection of Top 20 sher on Zindagi

T- 2 0 S H AYA R I

Read a collection of Top 20 sher by Ahmad Faraz

T- 2 0 S H AYA R I

Read a collection of Top 20 sher on Baarish

 POETRY

POETS 3370

GHAZALS 35916

NAZMS 6287

SHER 25514

MORE

E-BOOKS 49347

VIDEOS 5301

AUDIOS 2082

REKHTA EVENTS

REKHTA BLOG

INFO

ABOUT US

ABOUT THE FOUNDER

REKHTA IN NEWS
CAREER

CONTACT US

W R I T E T O U S

NAME

E-MAIL

MESSAGE

 SEND MESSAGE

FOLLOW US. WE'RE SOCIAL .

    

P R I VAC Y P O L I C Y TERMS OF USE COPYRIGHT