NRK Møre og Romsdal – Lokale nyheter, TV og radio

Det har vore ei bilulykke på E39 ved Verftsgata i Molde. Ifølge politiet skal berre ein bil vere involvert.

Politiet i Kristiansund ber om at personar som var vitne til ein påkøyrsel førre torsdag tek kontakt. Det skriv Tidens Krav.

Ein gut i tenåra blei påkøyrt på Nordlandet i Kristiansund. Vedkomande blei frakta til sjukehus etter hendinga.

Til avisa opplyser politiet at dei framleis etterforskar saka, men at dei har avhøyrt føraren. Dei ønskjer også å høyre frå folk som kan ha vore vitne til hendinga.

Ein mann i 40-åra frå Romsdal er dømt til fengsel i 21 dagar for å ha køyrt bil medan han var påverka av narkotika. Fengselsstraffa er utsett med ei prøvetid på to år på det vilkår at mannen gjennomfører eit program mot ruspåverka køyring.

Det var i fjor at mannen sette seg bak rattet og køyrde inn i ein annan bil bakfrå, då den bremsa ned. Ifølge dommen skal mannen i forkant av dette ha køyrt forbi ein annan bil.

Mannen var påverka av fleire typar narkotika, og skal ha hatt ei promille på 1,2.

I retten forklarte mannen at han visste at han ikkje burde ha køyrt bil den dagen. Vidare forklarte han at han hadde prøvd å få hjelp til rusproblema sine og søkt om behandlingsplass, men hadde fått beskjed om at dei ikkje hadde plass. Han går no til behandling.

Mannen blei også dømt til å betale ei bot på 60.000 kroner og mister føreretten i to år.