tyttebær

Tyttebær er ein mellom 10 og 30 centimeter høg dvergbusk med vintergrøne, lêraktige blad. Blomane er kvite til raudlege, klokkeforma og sit saman i klasar. Frukta som blir danna, er eit raudt bær, tyttebæret, som inneheld mange frø.

Tyttebær finst på heile den nordlege halvkula, i Europa, Asia og Nord-Amerika. I Noreg er planten vanleg på skrinne stader i furuskog og på lyngheiar. I Jotunheimen veks tyttebær opp til 1800 meter over havet. Det finst to underartar av tyttebær i Noreg: vanleg tyttebær og småtyttebær.

Tyttebær har ein syrleg, litt beisk smak, og blir rekna for å vere eitt av dei viktigaste av dei ville bæra i Noreg. Dei blir sanka i store mengder, er lette å oppbevare rørt eller sylta, og blir brukte som tradisjonelt tilbehøyr til kjøt av vilt.

Tyttebær blei tidlegare brukt i folkemedisinen. Fødande kvinner drakk avkok av tyttebærlyng mot blødingar, og tørka tyttebærblomar blei nytta mot astma. Tyttebærsaft var eit middel mot feber.

Tyttebær held seg godt fordi dei inneheld benzosyre, eit vanleg brukt konserveringsmiddel (E 210). Tyttebær inneheld cirka 11 milligram vitamin C, 87 milligram kalium, 85 prosent vatn og 216 kilojoule tilført energi per 100 gram etande vare.

• lyngfamilien
• bær
• botanikk