Vest-Telemark blad

Vi må tilbake til folkerøystinga om norsk EF-medlemskap i 1972 før Vest-Telemark var klar for eit livsdyktig avisprosjekt. Vesttelane var massivt mot medlemskap, og aktivistar i dei seks kommunane Seljord, Kviteseid, Nissedal, Fyresdal, Tokke og Vinje gjekk saman om å gje ut trykt materiell med nei-profil. Samstundes var begge dei store avisene i fylket, TA og Varden, sterkt ja-farga.

Då folkerøystinga var over, blei meiningskampen ført vidare med ei eiga lokalavis for Vest-Telemark som det klare målet. Også Studentmållaget i Oslo og Riksfondet for nynorsk presse støtta den nye avisa. Eit arbeidsutval førebudde skipinga av eit aksjeselskap, og 2. juli 1973 var Vest-Telemark blad AS ein realitet.

Tore Skaug, ein klår EF-motstandar, blei redaktør. Bladstyret tinga seg til ei trykkeriavtale med Teledølens trykkeri på Notodden, der den gamle Venstre-avisa nyleg var lagd ned.

13. november 1973 kom det første nummeret, fire sider i fullformat. Dei fyrste åra kom avisa ut kvar tysdag og fredag, frå tidleg i 1975 trykt på eiga flattrykkrotasjonspresse i Kviteseid. I 1980 tok «Veslebladet», som avisa blei kalla, spranget over i offset, tabloidformat og tre utgåver i veka. Økonomisk sett var dei første ti–femten åra ein hårfin balansegang, men leiinga greidde med ymse knep å halde det gåande. Det var også til god hjelp at dei tilsette godtok tilnærma likeløn.

Avisa snakka ingen etter munnen og kom derfor etter måten snøgt på folkemunne i Telemark. «Veslebladet» blei den uredde avisa mot straumen som få trudde ville overleve. Avisa nekta å tone politisk flagg. Debattinnlegga mellom redaktør og blant anna ordførarar var både tydelege og viljesterke. Engasjerte debattinnlegg frå lesarane med svar frå politikarar, eller krangel naboar imellom i all offentlegheit, er stadig noko av det stoffet folk les først.

Opplaget til Vest-Telemark blad følgde ei jamnt stigande kurve, og då avisa utpå 1980-talet hadde tilkjempa seg kontrollen med den lokale annonsemarknaden, var ein på trygg grunn. Med eit relativt solid kapitaltilskot frå kommunane og dei lokale sparebankane kunne avisa på same tid ta i bruk eit moderne avishus og ei god rotasjonspresse.

Vest-Telemark blad vart ei inspirasjonskjelde for andre som ville starte lokalavis i distriktet i 1970-åra. Vest-Telemark blad er medlem av Landslaget for lokalaviser.