Sudndalen

Sudndalen er eit dalføre i Hol kommune i Buskerud fylke. Sudndalen er den øvre delen av Holsdalføret, mellom Bry bru og Strandavatnet (978–950 meter over havet) og har rundt 70 innbyggjarar (2019). I den nedre delen ligg Sudndalsfjorden (733 meter over havet; 1,8 kvadratkilometer i areal). Frå Strandavatnet og gjennom dalen renn Storåne (òg kalla Holselva) til møtet med Hallingdalselva.

Gjennom Sudndalen går fylkesveg 50 (Hol–Aurland). Dalen har mykje turisttrafikk og har fleire hotell og pensjonat, hyttesenter med meir, og dessutan alpinanlegg. I dalen ligg det fleire freda gardar.