Norske Skog

Norsk skogs ekspansjon i utlandet byrja òg i 1989. Ein vedtok då å byggje ein papirfabrikk i Golbey i Frankrike. Fabrikken stod ferdig i 1992 og vart i 1999 utvida med ei ny papirmaskin. Under leiing av Jan Reinås (konsernsjef i perioden 1994–2003) vart Norske Skog eit stort internasjonalt selskap. Konsernet kjøpte fabrikkar i Austerrike (1996), Tsjekkia (1997) og i Sør-Korea og Thailand (1998).

Saman med to asiatiske papirprodusentar oppretta Norske Skog i 1999 selskapet Pan Asian Paper Company (PanAsia) og overførte dei asiatiske fabrikkane sine dit. PanAsia hadde òg fabrikkar i Kina. Norske Skogs eigardel i PanAsia var opphavleg ein tredel, som vart auka til halvparten i 2001.

I 2000 vart det New Zealand-baserte treforedlingsselskapet Fletcher Challenge Paper (FCP) overteken med fabrikkar i Australia, New Zealand, Sør-Amerika og Canada. Dette oppkjøpet var det største noka norsk bedrift til då hadde gjort i utlandet (21 milliardar kroner). Samstundes vart Tofte Industrier og Folla Industrier selt til svenske Södra. I 2001 fylgde eit stort oppkjøp (over 8 milliardar kroner) i Europa av fabrikkar i Tyskland (Walsum i Duisburg) og Nederland (Parenco i Renkum).

Norske Skog var den største private skogeigaren i landet, men selde i perioden 2001–2003 skogeigedomane og kraftverka sine. Salet omfatta mellom anna kraftverk i Haldenvassdraget, Drammensvassdraget, Skiensvassdraget og Nord-Trøndelag, og dessutan store skogar på Austlandet, i Namdalen og i Sverige.

Frå 2003 førte ein global overproduksjon av avispapir til ein generell ubalanse i bransjen og økonomiske problem for Norske Skog. Konsernet varsla difor store kostnadskutt og nedbemanningar, og i 2004 gjekk Reinås av som konsernsjef og vart etterfylgd av Jan Oksum (konsernsjef til 2006). I 2005 kjøpte Norske Skog seg likevel opp til eineeigar i PanAsia (ca. 4 milliardar kroner).

I 2006 vart Union i Skien nedlagt. Same år selde Norske Skog òg sin eigardel (erverva gjennom FCP-kjøpet i 2000) i det kanadiske selskapet Catalyst Paper, den tredje største trykkpapirprodusenten i Nord-Amerika. Produksjonskapasiteten vart òg redusert ved fabrikkane i Australia og Sør-Korea. I 2006 vart dessutan dei siste delane av treindustrien i Forestia selde, mellom anna ein sponplatefabrikk i Våler. Norske Skog selde seg i 2006 òg ut av selskapet Nordic Paper, som Norske Skog og M. Peterson & Søn hadde danna fem år tidlegare med fabrikkar for produksjon av feittalltid papir i Geithus, Greåker og Sverige. Same år tiltrådde Christian Rynning-Tønnesen som ny konsernsjef, ei stilling han hadde ut året 2009.

I 2007 vart det vedteke å redusere meir av den europeiske produksjonskapasiteten sin av avispapir, mellom anna på fabrikkane Skogn og Follum. Same år auka Norske Skog sin eigardel til 40 % i Industrikraft Midt-Noreg og bygde eit gasskraftverk i Skogn (Biokraft AS).

I 2008 vart avispapirfabrikken i Štětí i Tsjekkia (erverva i 1997) seld, det same vart to avispapirfabrikkar i Sør-Korea, og ei papirmaskin ved Follum vart stansa. Fleire eigedomar vart selde, mellom anna Oxenøen ved Lysaker, der selskapet heldt fram med ein leigeavtale for hovudkontoret sitt. I 2009 selde Norske Skog òg produksjonsverksemda si i Kina. Av det opphavlege PanAsia var då berre verksemda i Thailand tilbake.

Saman med fire skogeigarorganisasjonar starta Norske Skog i 2008 selskapet Xynergo, som skulle framstille store mengder biodiesel av trevirke ved Follum, men selskapet vart avvikla i 2010.

I desember 2011 vart det så vedteke å nedleggje avispairfabrikken Follum Fabrikker vinteren 2012. Parenco-fabrikken i Nederland vart seld same år. I 2016 er verksemda avgrensa til produksjon av magasinpapir ved Saugbrugs i Halden og avispapirverksemd i Skogn. Den globale verksemda avgrensar seg til anlegg i Frankrike og Austerrike, og dessutan noko verksemd i Oseania og eit deleid anlegg i Malaysia.

Utover på 2000-talet vart det tydelegare at Norske Skog hadde store gjeldsproblem. Ved utgangen av 2016 hadde selskapet ei netto renteberande gjeld på 8,5 milliardar kroner, og i april 2017 gjekk det så langt at det vurderte å søkje konkursvern.

Konsernsjef Sven Ombudstvedt, som tok over etter Christan Rynning-Tønnesen i 2009, sa opp omgåande 7. mai 2017.

20. desember 2017 melde Norske Skog oppbod i Oslo byfutembete, med ei gjeld på 9,2 milliardar kroner. Det vart vedteke at papirfabrikkane, mellom dei Saugbrugs, vart auksjonerte bort. I mai 2018 vart selskapet kjøpt av investeringsselskapet Oceanwood.

I oktober 2019 selde Norske Skog papirfabrikken i Albury, Australia, til den australske emballasjegruppa Visy. Same månad vart selskapet notert på Oslo Børs med ein eigenkapitalverdi på 3,14 milliardar kroner.