Grímsey

Øya er oppbygd av vulkanske bergarter. Det er bratte fjell over alt, bortsett frå ved strandlina i sør. Høgaste punkt ligg 105 meter over havet.

Klimaet er relativt mildt på grunn av Golfstraumen. Varmaste månad er august med gjennomsnittleg 10 °C. Høgaste målte lufttemperatur er 26 °C. Kaldaste månader er februar og mars med gjennomsnittleg –6 °C.

Grímsey er treberr, men vegetasjonen er rik og består av grasmyr, eng og mose. Det er om lag ein million sjøfuglar til saman, mellom anna alke og lunde, i opptil 100 meter høge fuglefjell. Det einaste pattedyret er isbjørn, som opptrer på øya av og til. Det er fleire kommersielt viktige fiskearter.

Hovudnæringa er fiske. Det blir drive eit måteleg jordbruk, og innsamling av fugleegg er utbreidd. Arbeidsmarknaden er problematisk, og det er høge transportkostnader til fastlandet. Turisme er ei viktig næring.

Grímsey har hatt busetnad sidan vikingtida. På 1000-talet fanst ei Olavskyrkje på øya. Etter kristninga var øya eigd av eit kloster på fastlandet, som innbyggarane måtte svare årleg leige til i form av tørrfisk.

På 1700-talet heldt befolkninga på å døy ut av lungebetennelse og båtforlis, men øya blei ikkje avfolka. Grímsey kyrkje blei bygd av drivved i 1867 og renovert i 1956. Fyrtårnet blei bygd i 1937.

Skolen på øya underviser barn til og med åttande klasse. Vidare utdanning må dei ta i Akureyri. Grímsey har lenge vore kjent som ein bastion for sjakk. Grímsey-festivalen med vekt på gamle tradisjonar blir arrangert i mai–juni kvart år. Det årlege terrengløpet Arctic Run blei arrangert første gongen i 2012.

• Island
• Islands geografi
• Islands historie