Liar (Queen)
| Liar | ||
|---|---|---|
| Artista: | Queen | |
| Tipu album: | 7" sìngulu | |
| Data dâ nisciuta: | 14 di frivaru 1974 (USA) | |
| Durata: | 3 min 01 s | |
| Album di pruvinenza: | Queen I | |
| Gèniri: | Rock prugrissivu, Heavy metal | |
| Prudutturi: | John Anthony, Roy Thomas Baker, Queen | |
| Noti: | Pubblicatu comu double a-side nzemi a “Doing All Right” | |
| Cumpusituri: | Freddie Mercury | |
| Casa discugràfica: | Elektra (USA) | |
| Singulu pricidenti: | Keep Yourself Alive | |
| Singulu succissivu: | Seven Seas of Rhye | |
Liar è na canzuna dî Queen, scritta di Freddie Mercury e pubbricata comu secunnu sìngulu nnô discu Queen I dû 1973, primu album di lu gruppu. Fu pubbricata 'n virsioni sìngulu, cu la b-side “Doing All Right”, lu 14 di frivaru 1974 nnî Stati Uniti.
La canzuna
[cancia | cancia lu còdici]Liar fu scritta di Freddie Mercury ntô 1970 ma duranti lu so sviluppu vitti l'aiutu di tuttu lu restu dû gruppu. Fu propriu cu Liar ca nascìu la rèula ca, secunnu Mercury, cu avissi scrittu li paroli dâ canzuna fussi l'effittivu auturi dû pezzu. Tali rèula arristau finu â pubbricazzioni di l'ùrtimi dui album dû gruppu, The Miracle e Innuendo.
Lu riff di chitarra dapprincipiu fu cupiatu di “Lover”, nnâ vecchia canzuna di Sour Milk Sea (furmazzioni di cui facìa parti Freddie Mercury prima di fari parti dî Queen), e poi riarrangiatu pi ottèniri nu megghiu sonu. Chris Chesney, chitarrista dû pricidenti gruppu 'n cui militava Mercury, li Sour Milk Sea, dissi duranti na sissioni Q&A ('n ngrisi Questions and Answers, dumanni e risposti) nnô situ ufficiali dî Queen ca:
| « «Brian [May] arrubbò nu riff (fu forsi pi Liar?) e 'n na ntirvista vidiu mi dissi scusa 'n na manera assai mpacciata (ma assai onesta).» » | |
(Chris Chesney)
|
Liar è cunziddirata di tanti unu dî brani cchiù heavy metal dû gruppu; ncumenza cu nu assolu dî battirìi di Roger Taylor e nu lievi fausettu di Freddie Mercury (ô minutu 1:25) ca addiventa sempri cchiù viulentu, finu a tirminari cu na parti assai aggrissiva nnô cantu, e chitarri 'n stili Led Zeppelin. É prisenti puru n'assolu nun pubbricatu di bassu di John Deacon. Comu cunfirmatu dî partituri pubbricati di EMI, chista è una di pochi tracci dî Queen 'n cui è prisenti nu òrganu Hammond.
Performance live
[cancia | cancia lu còdici]Dapprincipiu, la canzuna nun fu assai apprizzata dû pùbbricu, ma duranti lu Sheer Heart Attack Tour fu prulungata finu a na durata di 7 minuti pi li forti richesti dî fan. Doppu avennu statu pi tanti anni trascurata nnî cuncerti dî Queen, fici lu so ritornu 'n na virsioni cchiù curta ntô The Works Tour dû 1984, mentri ntô Magic Tour dû 1986 fu utilizzatu sulu l'assolu dapprincipiu comu ntroducimentu a "Tear It Up".