Raised on Rock/For Ol' Times Sake[1] er eit studioalbum av Elvis Presley frå 1973. I lag med albumet Elvis, kom det ut etter den massive suksessen med Aloha From Hawaii (sjølv om heile albumet Elvis bestod av songar spelte inn før Aloha-showet). Albumet, som selde over ein million eksemplar verda over, vart spelt inn i Stax Studios i Memphis i Tennessee i juli 1973 og heime hos Presley i Palm Springs i California i september 1973. To songar frå desse innspelingane vart haldne att for albumet Good Times den neste våren. Dei første vokalspora vart spelte inn i juli 1973. «Raised on Rock» med B-sida «For Ol' Times Sake» var den einaste singelen frå albumet. Denne nådde 41. plassen på Billboard-lista og 42. plassen på countrylista i september 1973.[2]
Albumet var eit av få som ikkje gjekk inn på albumlista i Storbritannia, men singelen «Raised on Rock» / «For Ol' Times Sake» gjekk inn på den britiske lista. Some av songane er velkjende coverversjonar som «Are You Sincere», som hadde eksistert i mange år, men somme nye songar, som den første singelen, vart skriven for Presley, eller skriven av låtskrivarar han tidlegare hadde spelt songar av, som Mark James. Tittelsporet, «Raised on Rock,» har av historikarar som Roy Carr og Mick Farren i Elvis: The Illustrated Record blitt omtalt som ein merkeleg tekst, sidan Presley syng i første person om å vere eit barn som oppdagar rock and roll gjennom plater som «Johnny B. Goode», som kom samtidig med den tidlege karrieren til Presley.
I 1979 vart ein nedstrippa versjon av «Are You Sincere» gjeven ut på albumet Our Memories of Elvis og gjeven ut på singel. Denne nådde tiandeplassen på Billboard country-lista.[3] I 2007 vart Raised on Rock gjeve ut på ny på Follow That Dream i ei spesialutgåve med to plater som inneheldt originalalbumet og mange alternative opptak.[4]
