Andrea Barzagli

Andrea Barzagli

Personleg informasjon
Fødd	8. mai 1981 (43 år)
Fødestad	Fiesole
Høgd	186 cm
Posisjon	Forsvarsspelar
Ungdomsklubbar
	Rondinella
Seniorkarriere*
År	Lag	Kampar (Mål)
1998-2000 2000 2001 2001-03 2001-03 2003-04 2004-08 2008-11 2011-2019	Rondinella Pistoiese Rondinella Piacenza Ascoli (lån) Chievo Palermo Wolfsburg Juventus	51 (3) 5 (0) 13 (1) 0 (0) 46 (3) 29 (3) 142 (4) 75 (1) 206 (2)
Totalt		567 (16)
Landslag
2003-04 2004-2017	Italia U21 Italia	15 (0) 73 (0)
* Seniorklubbkampar og mål berre telt for nasjonal liga

Andrea Barzagli (fødd 8. mai 1981) er ein italiensk tidlegare fotballspelar, fødd i Fiesole, som har spela i forsvaret til den italienske klubben Juventus. Han har spela 50 landskampar (sommaren 2014) for Italia, fast i startoppstillinga under fotball-EM 2012 då Italia nådde finalen. Under VM i fotball 2006 spelte han to kampar i turneringa, som enda med VM-gull for Italia.

Klubbspel

Perioden 1998-2003 spelte Barzagli på lågare nivå i italiensk klubbfotball. Frå seriestart hausten 2003 spelte han for fyrste gong i Serie A. Etter ein sesong i Chievo vart han overført til Palermo sommaren 2004, ein klubb han spelte for i fire sesongar.

Sommaren 2008 gjekk Barzagli til den tyske klubben Wolfsburg, og vann seriegull i sin fyrste sesong. I januar 2011 vart han overført til italienske Juventus i Serie A. Med storklubben frå Torino vart han italiensk seriemeister tre år på rad; 2012-14.

Landslagsspel

Barzagli deltok på Italia sitt OL-lag som tok bronsemedalje under sommar-OL 2004. Same hausten, i november 2004 fekk han sin A-landslagadebut mot Finland. Under VM i fotball 2006 spelte han to kampar for verdsmeisterlaget, i kvartfinalen stilte han i staden for suspenderte Marco Materazzi. Han deltok i fotball-EM 2008, men deretter skulle det gå tre år før han atter fekk plass i fyrstellevaren på landslaget. Sidan oktober 2011 har han ofte vore på plass i midtforsvaret til Italia, både under EM 2012 og VM 2014.

Merittar

• VM-gull 2006 for Italia
• EM-sølv 2012 for Italia
• OL-bronse 2004 for Italia
• Tysk seriemeister 2009 med Wolfsburg
• Italiensk seriemeister 2012, 2013 og 2014 med Juventus