पप स्मोक

पप स्मोक
वास्तविक नाम	ब्याशार बराका ज्याक्सन
जन्म	(१९९९-०७-२०)जुलाई २०, १९९९ ब्रुकलिन, न्यु योर्क, संयुक्त राज्य अमेरिका
मृत्यु	१९ फेब्रुअरी २०२०(2020-02-19) (उमेर २०) लस एन्जलस, क्यालिफोर्निया, संयुक्त राज्य अमेरिका
विधा	हिप हप ड्रिल
वाद्ययन्त्र	स्वर
सक्रिय वर्ष	सन् २०१८ - सन् २०२०
लेबल	भिक्टर भिक्टर रिपब्लिक
सहयोगी	५० सेन्ट अ बूगी विथ द हुडी क्यालबोइ फिभियो फोरेन लिल टीजे पीएनबी रक क्वेभो
वेबसाइट	realpopsmoke.com popsmokeforever.com

पप स्मोक (अङ्ग्रेजी: Pop Smoke) नामले चिनिने ब्याशार बराका ज्याक्सन (अङ्ग्रेजी: Bashar Barakah Jackson) (जुलाई २०, १९९९ - फेब्रुअरी १९, २०२०) एक अमेरिकी र्यापर, गायक र सङ्गीतकार थिए । ब्रुकलिनको केनर्सीमा जन्मेका र हुर्केका पप स्मोकले सन् २०१८ मा बेलायती ड्रिल कलाकार र रचनाकारसँग काम गरी आफ्नो साङ्गीतिक कार्य जीवनको सुरुवात गरे । अप्रिल २०१९ मा "वेलकम टु द पार्टी" निकाले पछि उनी सङ्गीत जगतमा प्रख्यात भए ।

पप स्मोकले भिक्टर भिक्टर वर्ल्डवाइड र रिपब्लिक रेकर्ड्ससँग साझेदारी गरी सन् २०१९ मा आफ्नो प्रथम मिक्सटेप मीट द वू सार्वजनिक गरे । यो मिक्सटेपको "डियोर" नामको दोस्रो एकल बिलबोर्ड हट १०० मा बाइसौँ स्थानमा सूचिकृत भयो । उनको गृह आक्रमणको कारण भएको मृत्यु भन्दा झन्डै दुई हप्ता अगाडि सन् २०२० सार्वजनिक गरिएको उनको दोस्रो मिक्सटेप मीट द वू २ बिलबोर्ड २०० मा सातौँ स्थानमा सूचिकृत भयो । उनको मृत्युपश्चात सार्वजनिक गरिएको प्रथम स्टुडियो एल्बम शूट फर द स्टार्ज, एम फर द मून बिलबोर्ड २०० मा प्रथम स्थानमा सूचिकृत भयो र त्यसमा रहेका १९ मध्ये १९ गीतहरू नै बिलबोर्ड १०० मा सूचिकृत भयो ।

बाल्यकाल

जुलाई २०, १९९९ मा ब्याशार बराका ज्याक्सनको जन्म जमैकन आमा र पानामेनियन बुबाको ब्रुकलिन, न्यु योर्कमा अवस्थित घरमा भएको थियो । उनले आफ्नो बाल्यकाल ब्रुकलिनको केनर्सीमा बिताए । विद्यालयमा बन्दुक बोकेको हुनाले निष्काशन गरिएका पप स्मोकलाई दुई वर्ष घरबाट बाहिर निस्किन दिइएको थिएन । १५ वर्षको उमेरमा लागु पदार्थ बेच्नका लागि पप स्मोकले फिलाडेल्फियाको रकटप एकेडमीमा पाएको बास्केटबल छात्रवृत्तिलाई अस्वीकार गरेका थिए ।

कार्य जीवन

सन् २०१८ मा मौलिक सङ्गीत र र्याप गीत बनाउनु भन्दा अगाडि पप स्मोक जे ग्वापो जस्ता कलाकारको स्टुडियोमा गई ड्रिल र र्याप गीतको रिमिक्स बनाउँथे । उनका बुबाले उनलाई बोलाउने नाम पपा र उनका साथीहरूले उनलाई बोलाउने नाम स्मोक मिलाएर उनको छद्मनाम पप स्मोक भएको उनले एक जिनियस अन्तर्वार्तामा खुलासा गरे ।

अप्रिल २०१९ मा पप स्मोकले आफ्नो प्रथम मिक्सटेप मीट द वूको प्रथम एकल "वेलकम टु द पार्टी" सार्वजनिक गरे । निकी मिनाजलाई सहयोगी कलाकारको रूपमा बोलाई रिमिक्स निकालिएको यस गीतको स्केप्टासँगको दोस्रो रिमिक्स अगस्ट २०१९ मा सार्वजनिक गरियो । बेलायती ड्रिल निर्माता ८०८ मेलोसँग प्रायः गीत बनाउने पप स्मोकका सबै गीतहरूमा जस्तै यो गीतमा पनि बेलायती ड्रिलको प्रयोग गरिएको थियो । "वेलकम टु द पार्टी" लोकप्रिय भएपछि उनले लिल टीजेसँग "वार" र क्यालबोइसँग "१०० के अन अ कू" सार्वजनिक गरे । डिसेम्बर २०१९ मा उनले ज्याकबोइज र ट्रेभिस स्कटसँग "गाटी" निकाले जुन ट्रेभिस स्कटको सन् २०१९ मा सार्वजनिक गरिएको ज्याकबोइज नामक एल्बमको अन्तिम ट्र्याक थियो ।

फेब्रुअरी २०२० मा क्वेभो, अ बूगी विथ द हुडी, फिभियो फोरेन र लिल टीजेको सहयोगमा पप स्मोकले आफ्नो दोस्रो मिक्सटेप मीट द वू २ सार्वजनिक गरे । यसको सार्वजनिकीकरणको ५ दिनमा नै नावसँगको "वुल्भ्स", गनसँगको "डियोर (रिमिक्स)" र पीएनबी रकसँगको "लाइक मि" थपिएको एल्बमको डिलक्स संस्करण सार्वजनिक भयो । पप स्मोकको मृत्युपश्चात मे १४, २०२० मा उनका व्यवस्थापक स्टिभन भिक्टरले जून १२, २०२० मा पप स्मोकको प्रथम स्टुडियो एल्बम सार्वजनिक गरिने घोषणा गरे । अमेरिकी र्यापर ५० सेन्टले पनि ड्रेक र क्रिस ब्राउनको सहयोगमा यो एल्बम पूरा गर्ने इच्छा व्यक्त गर्दै पप स्मोककी आमालाई पुरस्कार कार्यक्रममा लाग्ने वाचा गरे । अप्रिलमा पप स्मोकको जीवनीमा आधारित वृत्तचित्र बनिरहेको घोषणा गरियो । जून १२, २०२० मा सार्वजनिक गरिनुपर्ने पप स्मोकको प्रथम स्टुडियो एल्बम शूट फर द स्टार्ज, एम फर द मून जुलाई १३, २०२० मा सार्वजनिक भएपछि बिलबोर्ड २०० लगायत विश्वव्यापी स्तरमा विभिन्न चार्टमा प्रथम स्थानमा सूचिकृत भयो । "फर द नाइट" र "द वू" लगायत अन्य गीतहरू बिलबोर्ड हट १०० मा पनि सूचिकृत भयो । पप स्मोकको २१ औँ जन्मदिन हुनुपर्ने जुलाई २०, २०२० मा उनको स्टुडियो एल्बमको डिलक्स संस्करण सार्वजनिक गरिएको थियो ।

अगस्ट २०२० मा पप स्मोकले २०२० फ्रेशम्यान क्लासमा सूचिकृत हुन स्वीकार गरेको एक्सएक्सएलद्वारा खुलासा गरियो । उनलाई पत्रिकामा सूचिकृत नगरेपनि एक्सएक्सएलले पप स्मोकसँगको अन्तर्वार्ता प्रकाशन गरेको थियो र उनको मृत्यु भएपनि उनलाई अझै फ्रेशम्यान क्लासको सदस्य मानिन्छ ।

कानूनी मुद्दा

जनवरी १७, २०२० मा पेरिस फेसन सप्ताहबाट फर्किदा पप स्मोकलाई गाडी चोरी गरेको आरोपमा जोन एफ केनेडी अन्तर्राष्ट्रिय विमानस्थलमा पक्राउ गरिएको थियो । प्रश्नको गाडी $३,७५,००० पर्ने एक रोल्स-रोइस रेथ थियो जुन एक दिनको लागि सङ्गीत भिडियोको लागि पप स्मोकले उधारो लिएका थिए । उक्त गाडीलाई ट्रकमा न्यु योर्क पुर्याइने योजना बनाइएको अनुमान गरे । उनले इन्स्टाग्राम र फेसबुकमा चोरिएको गाडीमा बसेको तस्वीर सार्वजनिक गरेका थिए । प्रहरीले ब्रुकलिनको केनर्सीमा अवस्थित पप स्मोककी आमाको घरबाट गाडी जफत गरी त्यसमा अलाबामाको लाइसेन्स प्लेट राखे । आफू माथि लागेका आरोपहरू अस्वीकार गरेका पप स्मोकलाई त्यही दिन $२,५०,००० जमानत तिरी मुक्त गरिएको थियो ।

मृत्यु

क्यालिफोर्नियाको हलिउड हिल्समा अवस्थित घरमा भएको आक्रमणमा परी फेब्रुअरी १९, २०२० मा पप स्मोकको मृत्यु भएको थियो । प्रहरी रिपोर्ट अनुसार फेब्रुअरी १९ को दिन बिहान साँढे ४ बजे ४ जना मुख लुकाएका व्यक्तिहरू पप स्मोकको घरमा आएका थिए । एक जनाले स्की मास्क लगाएका थिए भने अर्कोले बन्दुक बोकेका थिए । उनको हत्या पश्चिम संयुक्त राज्यमा भएपनि प्रहरीलाई पूर्वबाट सचेत गरिएको थियो । ६ मिनेट पछि प्रहरी आइपुग्दा पप स्मोकलाई टन्नै गोली लागेका थिए । उनलाई सिडर्स-सिनाई स्वास्थ्य केन्द्रमा लागिएको थियो जहाँ उनलाई मृत घोषित गरियो । फेब्रुअरी २१ मा उनको मृत्युको कारण छातीमा लागेको गोली भएको घोषणा गरियो ।

पप स्मोकलाई ब्रुकलिनको ग्रीनवुड सेमेटेरीमा गाडिएको थियो । जुलाई १० मा पाँच जना पुरुषलाई उनको हत्याको सम्बन्धमा पक्राउ गरिएको थियो । १९ वर्षको कोरी वकर, १८ वर्षको किआन्ड्रे रोजर्स र १७ र १५ वर्षका दुई व्यक्ति लगायत ४ जना व्यक्तिलाई समातिएको थियो । घर आक्रमण र चोरीको बेला हत्या भएको हुनाले यी व्यक्तिहरू मृत्युदण्डका लागि योग्य छन् । जक्वान मर्फी नामक पाँचौँ व्यक्तिलाई हत्या प्रयासको आरोपमा पक्राउ गरिएको थियो ।

विरासत

बेलायती ड्रिल प्रयोग गरिरहने पप स्मोकको गीत सन् २०१९ भरिका अन्य बिलबोर्ड हट १०० मा पहिलो स्थानमा सूचिकृत गीतहरू भन्दा बढी सुनिएको थियो । अमेरिकी ट्र्याप सङ्गीतमा बेलायती ड्रिलको मिश्रणका साथै केहीको पर्वाह नगर्ने खाले उनका गीतका शब्दहरूले गर्दा उनले अरू र्यापरहरूभन्दा बढी प्रसिद्धि पाए ।

उनको कार्य नीतिलाई ५० सेन्ट र क्वेभोले पनि प्रशंसा गरेका थिए । आफ्नो पुरानो र गरिब जीवनशैलीलाई छाडेर आफ्नो लागि राम्रो जीवन बनाउने उसको चाहनाले उनका प्रशंसकलाई पनि प्रेरित गरेको छ । उनको मृत्युको केही महिना पछि उनको परिवार र प्रियजनहरूले प्रतिकूल अवस्थामा बस्नुपरेका युवायुवतीलाई आफ्ना इच्छा चाहना पूरा गर्न सहयोग गर्न शूट फर द स्टार्ज नामक संस्थाको स्थापना गरे ।

उनको मृत्युपश्चात केनर्सीमा उनका भित्तेचित्रहरू बनाइएका थिए । उनको दाहसंस्कारमा अनुमानित हजार जना व्यक्तिहरू उपस्थित थिए । पप स्मोकका गीतमा रङ्गभेद र प्रहरीको क्रूरताको बारेमा केही उल्लेख नगरिए पनि न्यु योर्क सहरमा जोर्ज फ्लोइड आन्दोलनमा उनलाई प्रतिरोधको चिनो बनाइएको थियो ।

सङ्गीत

• शूट फर द स्टार्ज, एम फर द मून (सन् २०२०)

पुरस्कार तथा नामाङ्कन

वर्ष	पुरस्कार	नामाङ्कित	श्रेणी	परिणाम	सन्दर्भ
सन् २०२०	बिइटी अवार्ड्स	आफैँ	सर्वोत्कृष्ट नवीन कलाकार	मनोनित

अभिनय

वर्ष	नाम	भूमिका	टिप्पणी	सन्दर्भ
सन् २०२०	टीबीए	आफैँ	वृत्तचित्र
सन् २०२०	बूगी		सानो भूमिका