matsopp

I Noreg blir omtrent hundre artar brukte som matsopp. Matsoppen veks stort sett i skogen. Nokre finst også i parkar, hagar og på beite. Dei fleste norske matsoppane veks opp av bakken. Nokre veks på tre og på gamle stubbar, til dømes stubbeskjellsopp og svovelsopp.

Desse soppane er mellom dei mest populære:

• steinsopp
• kantarell
• lyse piggsoppar
• fåresopp
• traktkantarell

Nokre typar sopp er giftige, og enkelte er så giftige at ein kan døy av dei. Nokre matsoppar kan likne på giftige soppar. Det er difor viktig å vere heilt sikker på kva sopp ein har plukka, før ein smaker på han. I Noreg finst det soppar som er så giftige at sjølv ein liten bit kan vere døyeleg.

Det er tryggast å plukke ulike typar sopp i kvar sin pose eller kvar si korg. Plukk éin og éin sopp. Pass på at det ikkje kjem med nokon ekstra soppar i korga.

Den sikraste måten for å finne ut om ein har funne matsopp, er å ta soppane med til ein soppkontroll. Ein kan også nytte ei soppbok, eller sende inn bilete av soppen til ein digital soppkontroll.

Soppkontroll er eit tilbod til alle som plukkar sopp. I kontrollen sit det folk som har spesiell utdanning, for å kunne kjenne att ulike typar sopp. Dei blir kalla soppsakkunnige. Ein kan ta med seg soppar ein har funne til soppkontroll. Då kan ekspertane fortelje kva sopp det er og om det er trygt å ete han. På hausten er det soppkontroll mange stader i landet.

I appen som heiter Digital soppkontroll får ein også hjelp av ekspertar, slik at ein kan vere trygg på kva sopp ein har funne.

Nokre matsoppar kan dyrkast. Dei lever som nedbrytarar, og kan til dømes leve på daude tre eller på søppel, som kaffigrut. Eksempel på dei er sjampinjong eller østerssopp, som ofte er å finne ferske i butikken.

Matsopp inneheld mellom 75 og 93 prosent vatn. Dei inneheld også protein, mineral og vitamin.

• sopp
• sopp som mat