Golfstraumen er ein varm havstraum i Atlanterhavet.
Havstraumen startar i området mellom Florida (USA), Cuba og Mexicogolfen, bevegar seg derfrå nordover langs austkysten av USA og Canada, og over Atlanterhavet til Europa.
Den norske atlanterhavsstraumen som går langs kysten av Noreg, er ei forlenging av Golfstraumen. Den varme lufta som følgjer Golfstraumen gjer at klimaet i Noreg er mildare enn til dømes i Alaska (USA), som ligg like langt nord.
Beskriving
Golfstraumen er over 500 meter djup. Der han startar er temperaturen rundt 25 grader om vinteren og over 28 grader om sumaren. Passatvinden driv havstraumar vestover i tropane frå Afrika. Vestavinden driv så Golfstraumen nord og austover. Dimed blir ein stor virvel skapt (gyre) som sirkulerer i retninga til urvisaren. Den vestlege delen av gyren er meir intens enn den austlege på grunn av rotasjonen til Jorda.
Golfstraumen blir kjølt ned heilt nord i Atlanterhavet og møter ferskvatn frå Polhavet. Der søkk det salte, avkjølte vannet ned i djuphavet og strøymer sørover langs havbotnen. Dette er ein del av det termohaline straumdraget i Atlanterhavet.
Klima
Golfstraumen transporterer varmt vatn frå tropiske område og fører dette vatnet nordover i Atlanterhavet. Vatnet øvst i Golfstraumen er varmare enn i djuphavet og har mykje næring og oksygen. Dette gjer gode vilkår for plantar og dyr i havet.
Golfstraumen påverkar klimaet i den austlege delen av Nord-Amerika og i Europa. Han gjer lufta varm og fuktig langs kysten. Denne lufta treng òg inn over land og gjer at områda er gode stader å dyrke mat på.
Golfstraumen regulerer temperaturen i mange område. Når han fraktar varmt vatn frå tropane til Nord-Atlanteren, varmar han opp lufta over vatnet. Det fører til milde vintrar i Europa.
Klimaendringar
Når temperaturen stig og isbrear i Arktis smeltar meir, vil det kome meir ferskvatn i Atlanterhavet. Då kan Golfstraumen reduserast i stryke eller til og med stoppe heilt.
Dersom dette skjer, vil det ha store konsekvensar for klimaet på jorda. Det kan til dømes bli mykje kaldare i Europa enn det er no. Det kan gjere det vanskelegare å dyrke mat, og mange dyr og plantar vil kanskje ikkje overleve.