Narva (stad)
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Narva is de daarde stad vaan Esland. De stad tèlde 53.360 inwoeners op 1 jannewarie 2024 en zie ligk aon de gelieknaomege revier (de Narva) in 't uterste noordooste vaan 't land, tege de grens vaan Rösland.
Narva is 'n wiechtege industriestad mèt 'n dominant Rössischtaolege bevolking. De stad kin weure besjouwd es 't centrum vaan de Rösso-Eslandse minderheid die ziech door de jaore heer ummertouw mie es 'n deil is gaon zien vaan de Eslenders in plaots vaan de Rösse. De industrie vaan de stad kaom in de 19e iew tot bleui. De belaangrijke textielfebrik Kreenholm besteit sinds 1857 en is geneump nao 'n eilendsje in de revier.
De revier vörmp de grens mèt Rösland: aon d'n aandere kant ligk Ivangorod. Aon bei kante ligk e fort. Dat vaan Narva heet de Hermannsfeste op 't Duits ofwel de Hermanni linnus op 't Eslands. Tösse de twie kastele ligk de Vrundsjapsbrögk. Aon de Europese kant steit, neve de Eslandse veendel, ouch de veendel vaan de Europese Unie. Aon d'n aandere kant dee vaan Rösland. 't Kasteel woort in d'n daartienden iew gebouwd door de Dene en woort daonao de meis oostelek gelege börch vaan de Duitse Orde.
Tot d'n Twiede Wereldoorlog waor Narva 'n multicultureel stad, mèt 'n Eslandse mierderheid, 'n Rössische minderheid en 'n belaangrieke cultureel elite veural bestaonde oet Baltische Duitsers. De stad stoond bekind um häöre barok. Daovaan is bekans niks mie te zien in 't allewijl stedsje, wie dat is verweus tijes en nao d'n oorlog. Allein 't stadhoes, in 't centrum vaan de stad, rappeleert nog e bitteke aon deen tied.