Mistoqsijiet frekwenti - Żwieġ
Iżżewwiġt f’pajjiż tal-UE fejn m’iniex ċittadin nattiv. Hemm bżonn nirreġistra ż-żwieġ f’pajjiżi?
Tista’ titlob li ż-żwieġ tiegħek jiġi rikonoxxut u reġistrat fil-pajjiż tal-oriġini tal-UE tiegħek. Madankollu, kun af li f’xi każijiet ir-rikonoxximent u r-reġistrazzjoni taż-żwieġ tiegħek f’pajjiżek fl-UE jaf ikunu obbligatorji.
Fil-każ ta’ żwiġijiet bejn persuni tal-istess sess, ir-rikonoxximent u r-reġistrazzjoni taż-żwieġ tiegħek konkluż f’pajjiż ieħor tal-UE bħalissa hu possibbli biss jekk il-pajjiż tal-oriġini tal-UE tiegħek hu wieħed minn dawn li ġejjin: l-Awstrija, il-Belġju, id-Danimarka, l-Estonja, il-Finlandja, Franza, il-Ġermanja, il-Greċja, l-Irlanda, il-Lussemburgu, Malta, in-Netherlands, il-Portugall, is-Slovenja, Spanja u l-Iżvezja. Ir-rikonoxximent u reġistrazzjoni ta’ żwiġijiet bejn persuni tal-istess sess hu possibbli wkoll fl-Iżlanda, fin-Norveġja u fl-Iżvizzera.
Jien u l-għarus tiegħi ngħixu fis-Slovakkja u nixtiequ niżżewġu fl-Italja waqt li nkunu hemmhekk għal btala. Għandna d-dritt awtomatiku li niżżewġu f’pajjiż ieħor tal-UE?
LE — Huma l-awtoritajiet Taljani li jiddeċiedu jekk tistgħux tiżżewġu hemmhekk. Ġieli dan jippermettuh biss jekk ikollkom xi tip ta’ rabta mal-Italja — pereżempju mill-inqas wieħed minnkom kien jgħix hemmhekk jew għandu ċittadinanza Taljana.
Ladarba tmorru lura fis-Slovakkja, ikollkom tiksbu r-rikonoxximent u r-reġistrazzjoni taż-żwieġ tagħkom hemmhekk abbażi taċ-ċertifikat taż-żwieġ Taljan tagħkom. B’hekk tkun tistgħu tiksbu l-aġġornament tal-istat ċivili tagħkom fir-reġistru Slovakk.