Virreinatu de Nueva Granada

	virreinatu del imperiu español
Alministración
Estáu desapaecíu	[[Imperiu Español\|{{{2}}}
Capital	Bogotá
Xeografía
Coordenaes	4°39′N 74°03′W / 4.65°N 74.05°O
Economía
Moneda	Real español

Virreinatu de Nueva Granada foi'l nome que recibieron, el 27 de mayu de 1717^[1], el conxuntu de los territorios del Imperiu español asitiaos na fastera septentrional d'América del Sur, qu'anguaño ocupen Colombia, Ecuador, Panamá y Venezuela. El territoriu del actual Panamá foi añadíu en 1739, y les provincies de Venezuela foron separtaes del virreinatu y asignaes a una nueva división alministrativa, la Capitanía Xeneral de Venezuela, en 1777. Amás de los territorios citaos el virreinatu incluyía tamién l'actual Guyana, el suroeste de Surinam, partes del noroeste de Brasil y el norte del actual Perú.

Historia colonial

La creación d'un virreinatu propiu pa Nueva Granada en 1717 rellaciónase cola lentitú de les comunicaciones ente'l gobernador del Nuevu Reinu de Granada, establecíu nel sieglu XVI como territoriu dependiente del Virreinatu de Perú, y del rexente de l'audiencia de Santa Fe de Bogotá, coles autoridaes virreinales de Lima, que dificultaben la correuta alministración del territoriu. Con esi actu colocáronse embaxu de la xurisdicción de Bogotá los actuales Colombia y Ecuador, les provincies meridionales y orientales de l'actual Venezuela y Panamá, convirtiendo a esta ciudá nún de los principales centros alministrativos, xunto con Lima y Ciudá de Méxicu, de les posesiones españoles del Nuevu Mundu. Ficiéronse intentos ocasionales de reforma del virreinatu pa centralizar l'autoridá y aumentar la eficiencia, pero'l control español sobro'l territoriu nunca foi mui efectivu.

La complicada orografía de la rexón y la falta de carreteres y caminos adecuaos ficieron perdifícil la comunicación y los viaxes dientro'l virreinatu. La necesidá d'un gobiernu efectivu acabó llevando al caltenimientu de l'Audiencia de Quito, suxeta nominalmente a l'autoridá del virréi pero de facto cuasi independiente d'elli, y a la creación d'una capitanía xeneral autónoma con sé en Caraques. Dellos historiadores consideren qu'estes decisiones reflexaben la esistencia de tradiciones llocales hasta ciertu puntu estremaes, que contribuyeron al desarrollu de diferencies nacionales y polítiques nesos territorios cuando s'independizaron nel sieglu XIX, diferencias que los intentos xunificadores de Simón Bolívar nun pudieron superar.

La rebelión guajira

El pueblu wayú nun fora domináu polos españoles, y vivía nún estáu d'independencia de facto. La situación ente ambos yera d'un estáu de guerra casi permanente. Hebo rebeliones en 1701 (con destrucción d'una misión de los capuchinos), 1727 (cuando más de 2.000 wayúes atacaron a los españoles), 1741, 1757, 1761 y 1768. En 1718 el gobernador Soto de Herrera refiriose a ellos como "bárbaros, lladrones de caballos que merecen morrer, xente ensin Dios, ensin llei y ensin rei". De tolos indíxenes del territoriu colombianu los wayú foran los únicos que sabíen usar caballos y armes de fueu.

En 1769 los españoles capturaron a 22 wayúes col envís de que trabayaren na construcción de les fortificaciones de Cartagena de Indias. La reacción wayú foi inesperada. El 2 de mayu de 1769 atacaron ya incendiaron El Rincón, un pueblu cerca de Riohacha: prendieron fueu a la ilesia con dos españoles que se refuxaran nella, y apresaron al cura. Los españoles unviaron darréu una espedición militar, dirixida por José Antonio de Sierra, un mestizu que yá dirixera la misión na que se capturara a los 22 wayúes, pa castigalos. Los wayúes reconocieron a esti cabezaleru militar, y tres d'obligar a los sos soldaos a buscar refuxu na vicaría del pueblu, prendiéron-y fueu. Sierra y ocho de los sos homes morrieron nel incendiu.

Cuando la noticia d'esti ésitu aportó a otres rexones de población wayú espardióse la revuelta, que llegó a xuntar a 20.000 wayúes, armaos con armes de fueu adquiríes a traficantes ingleses, holandeses ya inclusive españoles. Estos tomaron, y dieron fueu, a casi tolos asentamientos españoles de la rexón, con más de 100 españoles muertos y otros más fechos prisioneros. Los españoles sobrevivientes refuxáronse en Riohacha y unviaron pidimientos d'ayuda urxente a Maracaibo, Valledupar, Santa Marta y Cartagena. La última ciudá unvió a cien soldaos, demientres qu'apaecieron diferencies ente los rebeldes. Dellos parientes indios de Sierra llevantáronse escontra los rebeldes pa vengar la so muerte, y hebo una batalla ente los dos grupos de wayúes en La Soledad. Esi fechu y la llegada de los soldaos españoles punxeron fin a la rebelión^[2].

Historia tres la independencia

Los territorios del virreinatu algamaron una independencia total de facto respecto a España ente 1819 y 1822, formando una república conocida como Gran Colombia. De la so disolución surdieron los estaos d'Ecuador, Venezuela y la República de Nueva Granada. Esta cabera, con capital en Bogotá, perduró ente 1831 y 1856. El nome de Colombia reapareció nos Estaos Xuníos de Colombia, nuevu nome que-y punxo al país el gobiernu lliberal que xubió al poder tres d'una guerra civil. Sicasí nos círculos sociales más conservadores, como l'eclesiásticu, sobrevivió l'usu del términu Nueva Granada. Como ye vezu n'español, úsense nomes antiguos de los llugares pa formar los xentilicios y, asina, ye frecuente, especialmente en Venezuela, referise a los colombianos como neogranadinos.

Referencies

[1] Gaviria Liévano, E., El archipiélago de Los Monjes y las rellaciones diplomáticas con Venezuela: historia de una cesión territorial cuyas consecuencias siguen vigentes. Web de la Red Cultural del Banco de la República en Colombia.

[2] Barrera Monroy, E., La rebelión guajira de 1769: algunas constantes de la cultura wayuu y razones de su pervivencia. Web de la Red Cultural del Banco de la República en Colombia.

[1]

[2]