Wiener Zentralfriedhof

Wiener Zentralfriedhof

---

Ligging

Distrik Simmering
Wene, Oostenryk

---

Opening

1 November 1874

---

Oppervlakte

2,5 km² (250 hektaar)

---

Permanente grafte

330 000

---

Status

Steeds in gebruik

Die Wiener Zentralfriedhof ("Sentrale Begraafplaas van Wene") is die grootste begraafplaas in die Oostenrykse hoofstad Wene wat as laaste rusplek vir aanhangers van alle gelowe dien. Die dodeakker, een van die grootstes in Europa wat 2,5 km² met 330 000 permanente grafte beslaan, is tegelykertyd 'n parklandskap wat met sy ryk fauna en flora as ontspanningsterrein by hoofstadbewoners en toeriste gewild is. 'n Groot aantal eregrafte vir bekende persoonlikhede en geboue in die Jugendstil maak van die Wiener Zentralfriedhof, wat in 1874 geopen is, een van die mees besoekte besienswaardighede in Wene.

Ligging

Anders as wat die naam aandui, is die Wiener Zentralfriedhof nie in die Weense middestad geleë nie, maar aan die suidoostelike stadsrand gevestig – in Simmering, 'n nedersetting wat in 1874 nog nie deel uitgemaak het van die stadsgebied nie en eers in 1892 by Wene ingesluit is. Die begraafplaas – een van 'n vyftigtal in die Oostenrykse hoofstad – vervul nogtans 'n sentrale funksie as die grootste dodeakker in Wene, met grafkoste wat aansienlik laer is as op ander, meer sentraal geleë begraafplase met beperkte kapasiteite.

Simmering se hoofstraat, die belangrikste verkeersaar in die distrik, bied maklike toegang tot die begraafplaas. In die onmiddellike omgewing van die Wiener Zentralfriedhof het talle klipmesselaars, bloemiste en ander besighede, wat dienste in die begraafplaas lewer, hul bedrywe gevestig. Alhoewel die begraafplaas tussen die besige hoofstraat en die spoorlyn, wat die Weense middestad met die lughawe in Schwechat verbind, geleë is, word die uitgestrekte terrein grotendeels teen verkeersgeraas beskerm. Dit is nogtans reg onder een van die vlugroetes na die nabygeleë lughawe geleë, met talle vliegtuie wat op 'n lae hoogte invlieg.