The Color Purple (1985-rolprent)
| The Color Purple | |
|---|---|
| Regisseur | Steven Spielberg |
| Vervaardiger |
|
| Draaiboek | Menno Meyjes (draaiboek)
Alice Walker (roman) |
| Met | |
| Musiek deur | Quincy Jones |
| Kinematografie | Allen Daviau |
| Redigeerder | Michael Kahn |
| Ateljee |
|
| Verspreider | Warner Bros. |
| Uitgereik | 18 Desember 1985 |
| Speeltyd | 155 minute[1] |
| Land | VSA |
| Taal | Engels |
| Begroting | $15 miljoen |
| Bruto wins | $98,4 miljoen |
| IMDb-profiel | |
The Color Purple is 'n Amerikaanse epiese rolprent van 1985, 'n periodedrama oor 'n meisie se grootwordjare, wat deur Steven Spielberg geregisseer is. Die draaiboek is geskryf deur Menno Meyjes en is geskoei op die boek met dieselfde naam deur Alice Walker wat die Pulitzerprys gewen het. Dit was Spielberg se agtste rolprent nadat hy bekend geword het vir sy someravontuurtreffers. Dit was die eerste Spielberg-prent waarvoor John Williams nie die musiek geskryf het nie. Die musiek is deur Quincy Jones, wat ook een van die vervaardigers was.
Die akteurs sluit in Whoopi Goldberg (in haar deurbraakrol), Danny Glover, Oprah Winfrey (in haar rolprentdebuut), Margaret Avery en Adolph Caesar.[2][3] Die rolprent is verfilm in die distrikte Anson en Union in Noord-Carolina,[4] en vertel die verhaal van 'n jong swart Amerikaanse meisie, Celie Harris, en die gewelddadige ondervindings wat sy deurmaak, insluitende huishoudelike geweld, bloedskande, kindermolestering, armoede, rassisme en seksisme.[5]
Die fliek was 'n treffer by die loket en het $98,4 miljoen gemaak met 'n begroting van $15 miljoen. Dit het goeie resensies gekry, met spesiale lof vir Goldberg se toneelspel, die regie, draaiboek, musiek en vervaardiging. Dit is vir 11 Oscars benoem vir die 58ste Oscar-toekenningsaand, insluitende vir beste prent, beste aktrise vir Goldberg, beste vroulike byspeler vir beide Avery en Winfrey, en beste draaiboekverwerking. Dit het egter nie een gewen nie. Dit het vier benoemings vir 'n Golden Globe gekry, waarvan Goldberg vir beste aktrise in 'n drama gewen het. In 2006 het die Amerikaanse Rolprentinstituut dit 51ste geplaas op sy lys van inspirerende rolprente.
Ondanks die prent se sukses, was dit in 'n omstredenheid gewikkel. Baie het dit gekritiseer oor sy negatiewe uitbeelding van Amerikaanse swart mans, wat almal as gewelddadig gewys is. Dit is ook "oorsentimenteel" en "stereotipies" genoem. Die prent is deur die burgerregteaktivis Jesse Jackson en skrywer James Baldwin gekritiseer en is geboikot deur NAACP (die nasionale vereniging vir die bevordering van gekleurde mense) vir sy uitbeelding van verkragting en vir die "versterking van negatiewe sterotipes" van swart mans.
The Color Purple is in 2023 weer verfilm as 'n musiekrolprent wat geskoei is op die verhoogproduksie met dieselfde naam. Steven Spielberg en Quincy Jones was weer die vervaardigers in 2023, saam met Scott Sanders en Oprah Winfrey.
Verwysings
[wysig | wysig bron]- ↑ "The Color Purple (15)". British Board of Film Classification. 10 April 1986. Besoek op 16 Maart 2016.
- ↑ Stewart, Robert W. (7 Maart 1986). "Adolph Caesar: Fatal Heart Attack Fells Actor on Set". Los Angeles Times (in Engels (VSA)). ISSN 0458-3035. Besoek op 9 November 2018.
- ↑ Benke, Richard (7 Maart 1986). "Adolph Caesar Dead of a Heart Attack at Age 52". AP News. Besoek op 10 Februarie 2020.
- ↑ "The Color Purple filming locations". The 80s Movie Rewind. Besoek op 17 Januarie 2010.
- ↑ Corliss, Richard (23 Desember 1985). "Cinema: The Three Faces of Steve the Color Purple". Time. Geargiveer vanaf die oorspronklike op 4 Junie 2008. Besoek op 29 Oktober 2010.
Skakels
[wysig | wysig bron]
Hierdie artikel is in sy geheel of gedeeltelik uit die Engelse Wikipedia vertaal.
