KV5
| KV5 | ||
| Grafkelder van die seuns van Ramses II | ||
| ||
| Die plan van KV5. | ||
| Ligging | Vallei van die Konings | |
| Land |  Egipte
| |
| Ontdek | 1825 | |
| Uitgrawings deur | Kent R. Weeks (1995) | |
| Versiering | Mondopeningseremonie | |
| Uitleg | Doolhof | |
← Vorige KV4 Volgende →
KV6 | ||
KV5 is 'n grafkelder in die Vallei van die Konings by Thebe, naby die moderne stad Luxor in Egipte. Dit het behoort aan die seuns van Ramses II. Hoewel dit in 1825 reeds verken kon gewees het, is die ware omvang daarvan eers in 1995 ontdek deur Kent R. Weeks en sy uitgrawingspan. Dit is nou bekend as die grootste grafkelder in die vallei. Weeks se ontdekking word algemeen beskou as die dramatiesste sedert die ontdekking van KV62, die grafkelder van Toetankamen, in 1922.
Geskiedenis
[wysig | wysig bron]KV5 is naby die ingang tot die vallei geleë en is in antieke tye beroof.[1] Dit is ook deur die eeue, nes ander laaggeleë grafkelders, gevul met puin wat deur stormwaters ingespoel is.
Die grafkelder is verskeie kere ondersoek sedert uitgrawings in die vallei begin het: eers in 1825 deur James Burton en later, in 1902, deur Howard Carter, wat ook Toetankamen se graf ontdek het. Dié het KV5 as 'n stortingskelder gebruik. Hulle kon egter nie verder as die eerste paar kamers kom nie en het niks buitengewoons gesien nie.
Dit was eers nadat die Theban Mapping Project, onder leiding van Kent R. Weeks, begin het om die grafkelder skoon te maak dat sy ware aard ontdek is. Werk het in 1987 begin, maar die eerste aansienlike vonds is eers in 1995 gedoen. Sowat 70 kamers is gevind, asook lang gange wat tot diep in die heuwels geloop het. Die getal kamers stem min of meer ooreen met die getal seuns wat Ramses II verwek het. Die ontdekking het 'n wêreldwye opskudding veroorsaak en belangstelling in Egiptologie opnuut laat opvlam. Vondste tot dusver sluit in duisende potskerwe, begrafnisbeeldjies (oesjabti's), krale, skerwe met inskripsies en 'n groot standbeeld van Osiris, god van die hiernamaals.
Verdere uitgrawings het onthul die grafkelder is selfs groter as wat eers gedink is, want dit bevat nog gange, met nog kamers, wat vertak uit voorheen onontdekte dele van die grafkelder. Minstens 130 kamers is teen 2006 ontdek (waarvan net 7% skoongemaak is), en werk duur voort.[2][3]
KV7 is naby Ramses II se grafkelder geleë en bevat die mummies van die meeste van sy kinders, seuns en dogters, veral dié wat in sy leeftyd dood is.
Verwysings
[wysig | wysig bron]- ↑ Weeks, Kent R. (1998). The Lost Tomb. New York: William Morrow. ISBN 0-688-17224-5.
- ↑ "Audio - Atlas of the Valley of the Kings - Theban Mapping Project". Geargiveer vanaf die oorspronklike op 2 April 2012. Besoek op 25 Oktober 2011.
- ↑ "Valley of the Kings - KV5". Ancient Egypt - History & Chronology. Besoek op 8 April 2007.
Skakels
[wysig | wysig bron]
Wikimedia Commons het meer media in die kategorie KV5.
Hierdie artikel is in sy geheel of gedeeltelik uit die Engelse Wikipedia vertaal.
