Dearvvasvuođa- ja buresveadjinlágádus THL lea rahpamin jahkedoajáldagas ohcama, mas ohcet bálvalusafálli dorvoruoktodoibmii sámeguvlui. Stáhta boahtte jagi bušehttaárvalussii lea evttohuvvon vádjit 2,7 miljon euro lasáhusa dorvoruoktodoibmii.
Ovddidanhoavda Suvi Nipuli muitala, ahte ohcamiin hálidit nannet dorvoruoktodoaimma olles Suomas.
– Sámeguovllus bálvalus váilu ollásit. Mii hálidat lasihit dorvoruoktobáikkiid namalassii dakkár guovlluide, gos dat váilu.
Davimus dorvoruoktu dálá dilis doaibmá Roavvenjárggas. Nipuli dadjá, ahte máŋgasat vásihit dan leat menddo guhkkin Sámis.
– Jáhkán, ahte guhkes mátki dálá dilis lea okta eastta oažžut bálvalusa, danin mii sávvat, ahte sámeguovllus gávdnošii muhtin doaibmi dorvoruktui.
Dárkilut dieđut ohcamis, kriterain ja áigetávvaliin muitalit Dearvvasvuođa- ja buresveadjinlágádusa neahttasiiddus maŋŋelabbos.
Ii unnit báikkis go Avvilis, dadjá SámiSoster searvvi doaimmajođiheaddji
Sámiid sosiála- ja dearvvasvuođasuorggi searvvis SámiSosteris lea vásáhus bearraša siste dáhpáhuvvi veahkaválddis, go sii leat fállan rihkkosa gillájeaddji telefonbálvalusa (su. rikosuhripäivystys) sámegillii.
Doaimmajođiheaddji Ristenrauna Magga dadjá, ahte dorvoruktui lea dárbu, muhto dat ii sáhte fysalaččat goitge doaibmat menddo unna báikegottis. Su mielas unnimus báiki, gos dorvoruoktu sámeguovllus sáhtášii doaibmat, lea Avvil.
– Jus dat dorvoruoktu livčče vaikko Anára gilis, de ii dat leat dorvvolaš. Boles ja dearvvasvuođabálvalusat fertejit leat lahka, go dorvvolašvuođa dihtehan bearaš gártá dorvoruktui.