Kyevti pirrâmpeeivi äigi rähtiđ teema miäldásâš tiätturspellâ. Tot lii Siida Game Jam -tábáhtume ulme.
Sämimuseo Siijdâst Anarist tollui vuosmuu tove nuuvt kočodum spellâjamitábáhtus. Kulmâpiäivásâš tilálâšvuođâst rahtij speelâid, moi vuáđun lâi sämikulttuur.
Tilálâšvuotân poođij oovce uásálisted pääihi ool Anarân já 13 káidusuásálisted pirrâ maailm Discord-káidusohjelm peht, ovdâmerkkân Aotearoast já Kiinast.
Digitaallâš versio išedičij kavnâđ spellâskipárijd
Ohtâ rahtum speelâin lâi digitaallâš versio ärbivuáválâš sämmilâš Sáhkku-lyevdispeelâst.
Sáhkku-speelâ rähtei juávhu jođetteijen tâi nuuvt kočodum mentorin tooimâi Samuli Jääskeläinen, kii lii uásálistám suullân 120–130 spellâjamin pirrâ maailm.
– Aalgâst juávkku kalga máttááttâllâđ njuolgâdusâid já spelâškyettiđ. Mun, kote lam mäddin puáttám, jiem ovdâmerkkân lah kuássin spellâm tom speelâ, Jääskeläinen muštâl.
Sáhkku-juávhu jeessân Kajsa Møllersen muštâl, et Sáhkku lii Taažâ pele ennuv pivnohub spellâ ko Suomâst. Sun osko suijân tom, et historjistee Mikkel Berg-Nordlie lii máttááttâm speelâ aktiivlávt.
– Sáhkku spelleeh iä lah meendu ennuv. Lii vaigâd kavnâđ speelâ ustevijd. Jis ličij digitaallâš versio, te puávtáččij spellâđ jyehi peeivi, Møllersen muštâl.
Møllersen lasseet, et Vuonâmarkkânijn uárnejuvvoo jyehi ive Sáhkku maailmmiäštárkištoh já maaŋgâin sämiseervijn láá jieijâs spellâ- já Sáhkku-ehideh.
Jääskeläinen muštâl, et digitaallâš speelâ ulmen lii rähtiđ versio, moin ulmuuh pyehtih máttááttâllâđ njuolgâdusâid, et ij taarbâš luuhâđ muálkkáás teevstâ.
Uásálisteeh uážžuh inspiraatio sämimuseost
Ohtâ jamij uárnejeijein, čaaitâlmamanuens Reetta Tornensis muštâl, et Siida Game jamist speelâi teeman lii keerdih.
– Tot puáhtá leđe veikkâ keerdih ääigis, ulmuin, iäláttuvâin, historjást já nuuvt ain. Taam teema uásálisteeh uážžuh tulkkuđ maht peri, Tornensis iätá.
Uásálistein lii máhđulâšvuotâ uuccâđ inspiraatio museo čaitâlmijn já museo pargeeh fäälih äššitobdeevuođâ. Museo pisoi ávusin táválávt museokuosijd, mast šadda meid vuáruvaiguttâs spellârähtei já kuosij kooskân.
Siida Game Jam loopâst Jani Gröhn já Jade Walther Finnish Game Jamist čaittijn oholoopâ puátusijd Youtube-striimist. Sáhkku-lyevdispeelâ digitaallâš versio iskâm lii video vuosmuš spellâ.
Sáhkku puáhtá spellâđ kii peri.
Tábáhtus lâi ”Diginatiivih? Sämispeelah tääl!” -čaaitâlm miäldustábáhtus. Uási čaaitâlm speelâin lii šoddâm Ucjuuvâst 2018 uárnejum Sápmi Game Jamist. Tääl šoddâm speelah sättih kavnuđ puátteevuođâst spellâčaitâlmist.
Tábáhtus lijjii ornijmin Sämimuseo Siida, Finnish Game Jar rs sehe maaŋgah ollâopâttuvah já spellâsyergituáimeeh.