Vástuppeeivi sämimuusiik katalogi stuáru ko Jezebro ađai Jesse Ruokolainen almostit suu vuossâmuu skiäru Sábmái. Sun ráhtá muusik tavesämikielân já lii Ucjuuvâst meddâl.
Skiärru muštâl suu jurduin tast magareh tobdoh, fiäráneh já jurduuh šaddeh ko lii nuorâ sämmilâš. Ideaid sun lii uážžum jieijâs eellimpálgást já tast ko lii ráppár.
– Ko lam čáállám taid pittáid, te lam finnim ennuv uđđâ jurduid. Lam savâstâllâm ulmuigijn ennuv ovdâmerkkân sämmilâšvuođâst.
Skiäru porgâm lii lamaš kuhes proosees, mii lii pištám suulân kyehti ihe. Sun muštâl, ete vuossâmuš skiäruinis sun haalijd muštâliđ kii Jezebro tuođâi lii.
– Haljidâm čäittiđ maggaar stijláin mun máátám já lijkkuum ráppáđ. Lam kuldâlâm ennuv jazz, soul já funk muusiik. Lam finnim inspiraatio eromâšávt jazzrap musiikist, Ruokolainen čielgee.
Sábmái-sääni lii skiäru vuáđujuurdâ
Skiäru vuossâmuuh pitáh láá almostum jo muáddi ive tassaaš. Sun muštâl, ete muusiik ij pyevti rähtiđ huápoin. Jurduid já čalluid ferttee adeliđ ääigi, ete uáiná láá-uv ideah vala mottoom ääigi keččin äigikyevdiliih já kannat-uv tain rähtiđ valmâš pitá.
– Oovtâ pitá rähtimist toos jieš čälimân ij moonâ ko muáddi tijme, jis šadda tobdo ete ferttiim čäälliđ.
Ubâ skiäru idea lii šoddâm Sábmái-säänist já siämmáá nommâsâš pittá lii lamaš tehálumos pittá aalgâ rääjist. Sääni meerhâš olmoo kii haaldâš sämivuovijd tego kielâ já kulttuur, moh láá meiddei taan ulmui vááimu ääših.
– Halijdiččim, ete taat sääni puáđáččij oppeet eenâb kiävtun. Tot lii stuorrâ já tehálâš sääni muu mielâst, Ruokolainen muštâl.
Puátteevuođâst Ruokolainen áigu almostittiđ uđđâ muusik eres sämiartistijgijn.
– Must puáhtá vyerdiđ lase muusiik, jiem ááigu taas pisániđ.