Njuorggáma gilis lea dál vejolaš geahčahit biillaid oktii mánotbajis.
Taisto Länsman lei boahtán logemat kilomehtera geahčen Buolbmátjávrris geahčahit biilla. Su mielas lea somá, ahte son beassá dál geahčahit biilla Njuorggámis.
– Dathan gal helpe olu go ii dárbbaš vuodjit Avvilii, go muhtumin gártá vel moddiige vuodjit, jus ii mana čađa.
Ikte lei vuosttaš beaivi go fitnodatdoalli Tero Alenius lei geahčaheamen biillaid Njuorggámis. Visot doaimmai dego galggaige.
Dán muttus geahčahusaid ordnejit sullii oktii mánotbajis, muhto dat sáhttá rievdatge áiggebaji ja jearaldaga mielde, dadjá Alenius.
Jurdda fálaldahkii vulggii áššehasain ja Aleniusa mielde jearálmás dákkár bálvalussii gal lea: vuosttaš geahčahanbeaivi lei várrejuvvon dievva ja maid čuovvovaš geahčahanbeaivái mánotbaji geahččái leat várrejuvvon áiggit, son muitala.
Biillaid geahčahemiid dahket njuorggánlaš biiladivohaga sajiin. Samimootor doaimmajođiheaddji Ari Naapanki lea buriin mielain, go guhká vurdojuvvon bálvalus ollašuvai viimmat.
– Mii leat leamaš sierraárvvolaš sajádagas, go leat árat ferten gitta Avvila rádjái vuodjit. Olles beaivi lea mannan dan biilla geahčaheapmái, oaivvilda Naapanki.
Doaimmajođiheaddji mielde son ieš ii tine doaimmas olu maidige, muhto sutnje lei dehálaš oažžut fálaldaga gillái. Golutge leat šaddan ođđa bákkolaš dávviriid ja bargoneavvuid oastima dihte.
– Dieđusge dat doarju min divohatdoaimma maiddái, ahte jus váttuid fuomášit geahčahusas, de dasto vejolaččat daid dasto divvut mis.
