Säämi mytologia figureh läiđejeh ulmuid oraakelkoortâi peht – Toid puáhtá heiviittiđ taan piäiván, uáiná alkemist

Sini Sieppi ađai Junná Biehtár Armi Sini lii nuuvt kočodum alkemist já lii porgâm kuhháá jiegâlâš fáddáigijn. Sun lii ráhtám oraakelkoortâid, moi vuáđu lii sämimytologiast. Koortâin puáhtá uuccâđ ravvuid já laiđim jieijâs elimân.

Veikkâ tarot- já oraakelkoortah iä lah uási sämmilâš kulttuur, te Sini Sieppi uáiná, ete taid puáhtá heiviittiđ taan peeivi kulttuurân.

– Kielâ, kulttuur já osko muttojeh aaigij mield. Iähán sämmiliih innig aasâ kuáđist, Sieppi muštâl.

Juurdâ sämmilâš oraakelkoortâin šoodâi Sini Sieppi mielân 2018 Brasiliast. Siämmáá ive lijjii almostum kalevalâš tarotkoortah, moh kieđâvušeh syemmilâš mytologia.

Saamen oraakkelist láá 45 kovekorttâd, moin láá ereslágán koveh Säämi mytologiast, mainâsijn já luándust. Koortâin kávnojeh koveh ovdâmerkkân koccám kuobžâst, piäiváást já Sáráhkká imelist. Sieppi muštâl, ete koortâin puáhtá ovdâmerkkân ennustiđ já kirjeest puáhtá luuhâđ maid jieškote-uv korttâ meerhâš.

Raba gova stuorábun

Korttâpaakâst kávnoo ovdâmerkkân Siggá-korttâ. Sigá mainâsist kyehti almaa halijdává naaijâđ Sigá. Almaah karttâv taistâliđ nubijdis vuástá, mut kuohtuuh surmâšuv ige Siggá uážu kuábbáágin almaa.

– Sáttá leđe, ete tun lah kyevti ääši kooskâst já jis jieh määti valjiđ nube tâi nube, te jieh uážu maiden, Sieppi čielgee Siggá-koortâst.

Taah koortah láá uáivildum puohháid. Sieppi muštâl, ete tuoivâ tagarijd lii puáttám suu äššigâsâin.

– Sij láá perustum sämmilii mytologiast já halijdeh oppâđ ääšist eenâb.

Kirje lii almostum suomâkielân, mut Sieppi já Paltto halijdiččijn, ete kirje almostuvá vala aainâs-uv eŋgâlâskielân.

Koortâigijn porgâm išedij tuhhiittiđ jieijâs identiteet

Raba gova stuorábun

Sini Sieppi já suu viljâpeeli Alrik Paltto ađai Junná Biehtár Ansa Alrik algâttáin proojeekt 2018 nuuvt, ete jyehi mánuppaje šoodâi ohtâ korttâ já toos čielgiittâs. Koveh já teevstah šoddii vistig nettikuursâ várás.

Paltto muštâl, ete äigi kuás sun kuvvij koortâid ij lamaš älkkee. Sun luuvâi talle sämikielâ ige tot orroom monâmin pyereest, ko säneh iä puáttám mielân älkkeht. Loopâiloopâst sun ij halijdâm leđe ubâ sämmilâš.

Koortâi kuvvim lâi kuittâg sunjin terapialâš, ko koveh šoddii mielân älkkeebeht ko säneh.

– Motomin ij iššeed ko čokkáđ, čiärruđ já čäälliđ, Paltto muštâl ravvuu, mon lii finnim jieijâs professorist.