Badjel jagi bistán pandemiijaáigi lea máŋggabealagit váikkuhan olbmuid buresveadjimii. Ruoktu ii leat álo dakkár dorvvolaš báiki, go dat galggašii leat.
Dorvoruoktu lea báiki, gosa olmmoš sáhttá ohcalit, jus vásiha iežas bearrašis dahje ruovttus ovdamearkka dihte veahkaválddi. Sámis dorvoruoktu ii velá gávdno, muhto dat lea leamaš plánain juo guhká.
Roavenjárggas lea sámeguovllu ektui lagamuš dorvoruoktu.
Veahkaváldi ruovttuin lea bolesa diimmá loguid mielde lassánan. Maiddái neahtas doaibmi veahkehanbálvalusaid geavaheapmi lea lassánan.
Lagamuš dorvoruktui soaitá leat čuđiid kilomehteriid mátki Sámis
Lappi eanangotti guovllus lea dušše okta dorvoruoktu Roavenjárggas. Lappi vuosttas- ja dorvoruovttu rs (su. Lapin ensi- ja turvakoti ry) doaimmajođiheaddji Pirjo Kairakari muitala, ahte Roavenjárgga dorvoruovttus veahkehit olles Lappi guovllu olbmuid.
– Dat lea hástaleaddji. Dat soaitá leat hui stuorra hástalus vuolgit čuđiid kilomehteriid eará báikegoddái, gos dorvoruoktu lea, Kairakari dadjá.
Gii beare sáhttá váldit oktavuođa birra jándora sidjiide, eaige almmolaš johtolaga heajos oktavuođat oaččo váikkuhit dasa, beasságo olmmoš dorvoruktui vai ii. Dorvoruoktu ordne sáhtu dasa, guhte dan dárbbaša.
Dárbu nubbi dorvoruktui lea ja dan sávvet oažžut muhtin sámeguovllu báikegoddái.
– Mis lea niehku ja maid stáhtas lea nana jáhkku dasa, ahte man nu muttus mii lihkostuvašeimmet Lappii dahkat gáiddusdorvoruovttu. Gáiddusdorvoruoktu dárkkuha dan, ahte man nu báikegottis, millosabbot sámeguovllus, livčče sosiála- ja dearvvašvuođabálvalusaid ovttadat, man oktavuhtii sáhtášii ollašuhttit gáiddusdorvoruovttu.
Nu gohčoduvvon gáiddusdorvoruovttu orruma dárbbuin ja biebmofuolahusas fuolahivččii sosiála- ja dearvvašvuođabálvalusaid ovttadat. Veahkaváldái guoskevaš bálvalusat, ovdamearkka dihte doaktára dahje terapevtta deaivvadeamit, ollašuhttojuvvošedje gáiddusoktavuođaiguin nuppi dorvoruovttus.
Lappi dorvoruovttu gáiddusbálvalusaid geavaheapmi lassánii beliin
Doaimmajođiheaddji Pirjo Kairakari muitala, ahte koronapandemiija váikkuhusaid oaidná čielgasit Lappi dorvoruovttu doaimmas. Ovdamearkka dihte olbmot leat ohcan veahki eanet ja dorvoruovttu bálvalusaid áššehasaid mearri lea juoga veardde lassánan.
– Diibmá eandalitge veahkeheapmi neahtas lassánii badjel 50 proseanttain. Mun jurddašan, ahte dat lea buorre ášši, Kairakari oaivvilda.
– Lean hui ilus das, ahte olbmot leat duostan ohcat veahki.
Máŋgasiidda maid davvin šaddá dárbu ohcat veahki. Kairakari muittuha, ahte maiddái ieš veahkaválddálaš olmmoš soaitá ohcat doarjaga iežas láhttemii.
– Dat lea hui fiinna ášši, ahte olbmot, geaidda veahkaváldi lea vuohki birget váttis diliin, máhttet ohcalit veahki ja ságastallat minguin dain áššiin, dadjá Kairakari.
Yle Ođđasiid Sámis ja Beaivvi ságaid sáhtát maid guldalit Yle Areenas.