Tyssedal

Tyssedal er ein tettstad i Ullensvang kommune i Vestland. Tettstaden er ifølgje SSBs definisjon 0,6 km², og har 587 innbyggjarar (2023).

Tyssedal ligg ved munninga av elva Tysso på austsida av Sørfjorden i Hardanger, seks km nord for Odda.

I Tyssedal låg tidlegare eit aluminiumsverk i tilknyting til dei store kraftverka som forsynte industrien i Odda og på Eitrheim med elektrisk kraft. I dag driv Tinfos Titan Iron eit ilmenittsmelteverk på staden basert på råstoff frå Titania AS som har dagbrudd på Tellnes i Dalane i Rogaland.

I Tyssedal ligg Norsk Vasskraft- og Industristadmuseum (Kraftmuseet) som viser industrireising og kraftutbygging i eit historisk perspektiv. Her ligg det nasjonale vasskraftmonumentet Elektra av Finn Eirik Modahl. Monumentet vart innvigd i 2000.

Frå Tyssedal er det tilkomst til det spektakulære fjellutspringet Trolltunga, først med bil til Mogelii i vestenden av Ringedalsvatnet, og deretter ein rundt 14 km lang fottur kvar veg til fjellutspringet.