Supphellebreen var ein brearm av Jostedalsbreen i Fjærland, Sogndal kommune i Vestland fylke. Sumaren 2026 smelta han bort. Ein rekna med at breen var 3000–4000 år gammal.
Supphellebreen var kjent som ein av Jostedalsbreens vakraste brearmar. Breen trong ned i den tronge Supphelledalen, som går nordaust frå botnen av Fjærlandsfjorden. I den øvre delen av der breen låg, ragar Supphellenipa 1731 meter over havet, som er Sogndals høgaste fjell. Breen var avdelt oppe i fjellsida, der han styrta utfor som islavinar og danna ein ny bre i dalbotnen nedanfor, ein såkalla regenerert bre.
Supphellebreen var ein mykje besøkt og kjent turistattraksjon. Etter 1990 vaks den regenererte breen ein del. Våren 2004 rann vatn frå ein bresjø framfor Flatbreen gjennom endemorenen og forårsaka flaum. Flaumen tok med seg store mengder grus, slam og stein heilt ned i dalen, og vegen i dalen og innmark til to gardsbruk vart dekt av massane.
Supphellebreen var den breen i Sør-Noreg som nådde lågast ned mot havet, berre 60 meter over havet.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må vere logga inn for å kommentere.