George Kennedy

George Kennedy (folút: George Harris Kennedy jr.; New York, 18 febrewaris 1925 – Middleton (Idaho), 28 febrewaris 2016) wie in Amerikaansk akteur en skriuwer fan mingd Dútsk, Iersk en Ingelsk etnysk komôf, dy't yn mear as twahûndert films en tillefyzjeprogramma's spile. Hy fertolke in breed skala oan rollen, en wûn yn 1967 in Oscar yn 'e kategory bêste manlike byrol. By in jonger publyk stied er benammen bekend as haadynspekteur Ed Hocken, de gauris ta wanhoop dreaune sjef fan ynspekteur Frank Drebin (Leslie Nielsen) yn 'e Naked Gun-trilogy. Njonken syn aktearkarriêre skreau Kennedy twa misdieromans en in autobiografy.

George Kennedy
akteur
persoanlike bysûnderheden
echte namme	George Harris Kennedy jr.
nasjonaliteit	Amerikaansk
berne	18 febrewaris 1925
berteplak	New York (New York)
stoarn	28 febrewaris 2016
stjerplak	Middleton (Idaho)
etnisiteit	Dútsk Iersk Ingelsk
jierren aktyf	1927 – 1943 & 1955 – 2015
prizen	Oscar 1967
offisjele webside
George Kennedy yn 'e IMDb

Dizze side giet oer de akteur George Kennedy. Foar oare betsjuttings, sjoch: George Kennedy (betsjuttingsside).

Libben en karriêre

Jonkheid en oplieding

Kennedy waard yn 1925 berne yn New York, as telch út in laach fan artysten. Syn heit, George Harris Kennedy sr., wie in muzikant en orkestlieder mei Ierske en Ingelske woartels, dy't stoar doe't Kennedy sels noch mar fjouwer jier wie. Hy waard sadwaande grutbrocht troch syn mem, Helen A. Kieselbach, in balletdûnseresse fan Dútsk komôf. Kennedy makke syn debút as toanielakteur doe't er twa jier âld wie, en letter yn syn jonkheid wied er aktyf as harkspulakteur. Under de Twadde Wrâldoarloch tsjinne er fan 1943 ôf yn it Amerikaanske Leger, dêr't er by de legerradiostjoerder wurke.

Aktearkarriêre

Nei ôfrin fan 'e oarloch bleau Kennedy oant 1959 yn militêre tsjinst. As ûnderdiel fan syn wurk foar it Foarljochtingsburo fan it Amerikaanske Leger wied er yn 'e 1950-er jierren as technysk adviseur belutsen by de tillefyzjesearje The Phil Silvers Show, wêryn't er, dêrta oanfitere troch Phil Silvers sels, ek in weromkearende rol as militêre plysje fertolke. Nei't er ôfswaaid wie, sette Kennedy om 1960 hinne serieus útein mei in karriêre as akteur. Datselde jiers hied er in hiel lyts roltsje yn 'e histoaryske dramafilm Spartacus, oer de Slave-opstân fan Spartakus yn it Romeinske Ryk.

Kennedy as pastoar Sarge Cavenaugh yn 'e tillefyzjesearje Sarge (1971).

Syn earste gruttere rol hie Kennedy yn 'e film The Little Shepherd of Kingdom Come (1961). Yn 'e 1960-er jierren hied er fierders rollen yn ferskate grutte Hollywood-produksjes, wêrûnder de westernfilms Lonely Are the Brave (1962), The Sons of Katie Elder (1965), Bandolero! (1968) en Guns of the Magnificent Seven (1969), de romantyske komeedzje Charade (1963), de skriller Strait-Jacket (1964), de dramafilm The Flight of the Phoenix (1965) en de oarlochsfilms Shenandoah (1965) en The Dirty Dozen (1967). Yn 1967 wûn Kennedy in Oscar foar de bêste manlike byrol mei syn rol yn 'e film Cool Hand Luke as Dragline, in ta twangarbeid feroardiele finzene dy't earst in hekel hat oan it titelpersonaazje (spile troch Paul Newman), mar him úteinlik as in soarte fan idoal begjint te sjen. Foar dy rol waard er ek nominearre foar in Golden Globe yn deselde kategory.

Yn dyseldichste snuorje hie Kennedy gastrollen yn withoefolle tillefyzjesearjes, wêrûnder in protte westernsearjes, lykas Gunsmoke, Rawhide, Bonanza, The Virginian, The Big Valley, Laredo, The Legend of Jesse James en Daniel Boone. Ek wied er te sjen yn 'e komeedzjesearjes The Andy Griffith Show en McHale's Navy en de rjochtbankdramasearje Perry Mason. Kennedy hie de haadrol as pastoar Samuel Patrick "Sarge" Cavanaugh yn 'e detektivesearje Sarge (1971) en as Bumper Morgan yn 'e plysjesearje The Blue Knight (1975).

Yn 1970 spile er de rol fan Joe Patroni yn 'e bekroande rampefilm Airport, wêrfoar't er jitris nominearre waard foar in Golden Globe yn 'e kategory bêste manlike byrol. Kennedy kearde noch trije kear yn dyselde rol werom, yn 'e ferfolchfilms Airport 1975 (1974), Airport '77 (1977) en The Concorde... Airport '79 (1979). Yn 'e 1970-er jierren wurke er ek gear mei John Wayne, yn 'e westernfilm Cahill, U.S. Marshal (1973), en mei Clint Eastwood, yn 'e lichtfuottige roadmovie Thunderbolt and Lightfoot (1974) en de spionaazjeskriller The Eiger Sanction (1975). Fierders wied er yn 1974 te sjen yn 'e rampefilm Earthquake, mei û.o. Charlton Heston en Ava Gardner, en yn 1978 spile er yn 'e detektivefilm Death on the Nile, mei û.m. David Niven en Peter Ustinov.

Yn 1984 wie Kennedy de tsjinspiler fan Bo Derek yn 'e flop Bolero. Neitiid makke er noch ferskate oare mindere films, lykas Savage Dawn (1985), The Delta Force (1986) en The Gunfighters (1987), foar't er yn 1988 min ofte mear by tafal nij súkses fûn mei de kaskreaker The Naked Gun: From the Files of Police Squad! Dat wie in slapstickeftige komeedzjefilm wêryn't Kennedy de rol fan haadynspekteur Ed Hocken spile, dy't by fleagen ta wanhoop dreaun wurdt troch de nuvere eksploaten fan syn knoffelige ûnderhearrige, ynspekteur Frank Drebin, spile troch Leslie Nielsen. Kennedy kearde noch twaris werom as Hocken foar de beide ferfolchfilms út 'e Naked Gun-trilogy: yn 1991 yn The Naked Gun 2½: The Smell of Fear, en yn 1994 yn Naked Gun 33⅓: The Final Insult.

Underwilens fertolke Kennedy op 'e tillefyzje fan 1988 oant en mei 1991 de rol fan 'e korrupte oaljetycoon Carter McKay yn 'e ferneamde soapsearje Dallas. Yn 1996 en 1998 wied er op 'e nij yn dy rol te sjen yn 'e tillefyzjefilms Dallas: J.R. Returns, resp. Dallas: War of the Ewings. Yn 1995 spile Kennedy de rol fan generaal Nelson A. Miles yn 'e westernminysearje The Gambler Part III: The Legend Continues, mei Kenny Rogers yn 'e titelrol. Yn 1998 wurke er fierders as stimakteur mei oan 'e tekenfilm Small Soldiers. Neitiid makke Kennedy ferskate ûnôfhinklike films, foar't er yn 2003 weromkearde op 'e tillefyzje yn 'e rol fan Albert Miller yn 'e soapsearje The Young and the Restless. Kennedy bleau oan syn dea ta mei lytse roltsjes yn films en op 'e tillefyzje aktyf. Foar syn bydrage oan 'e Amerikaanske filmyndustry krige er in stjer op 'e Hollywood Walk of Fame, op 6352 Hollywood Boulevard.

Kennedy as plysjeman Bumper Morgan yn 'e tillefyzjesearje The Blue Knight (1976).

Skriuwkarriêre

Njonken syn aktearwurk wie Kennedy ek yn it spier as skriuwer. Yn 1983 publisearre er it moardmystearje Murder on Location, wêrfoar't er in filmset as setting brûkte. In twadde roman, Murder on High, kaam út yn 1984. Syn trêde en lêste boek wie syn autobiografy, Trust Me, dy't yn 2011 ferskynde.

Priveelibben

Kennedy troude yn 1959 mei Norma Wurman, fan wa't er him yn 1971 skiede liet. Neitiid wertroude er yn 1978 mei Joan McCarthy, mei wa't er in dochter, Shaunna, krige. Nei't dyselde yn it tichthûs belâne, adoptearren Kennedy en de frou harren pakesizzer, it famke Taylor. Kennedy hie in fleanbrevet en fleach as piloat gauris yn syn eigen Cessna 210 Centurion- en Beechcraft Bonanza-priveefleantugen.

Ferstjerren

George Kennedy wenne yn Eagle, yn it súdwesten fan 'e Amerikaanske steat Idaho. Op it lêst bedarre er yn in fersoargingssintrum yn it deunby leine Middleton. Dêr kaam er op 28 febrewaris 2016 te ferstjerren, yn 'e âlderdom fan 91 jier.

Filmografy

Filmografy as akteur
jier	titel	rol of funksje	opmerkings
tillefyzje
1956–1959	The Phil Silvers Show	militêre plysje-sersjant Kennedy	weromkearende rol; 14 ôfl.
1959	Cheyenne	Lee Nelson	gastrol; ôfl. Prisoner of Moon Mesa
1959	Colt .45	Hank	gastrol; ôfl. The Rival Gun
1959	The Deputy	Tex	gastrol; ôfl. The Big Four
1959	Sugarfoot	Sykes	gastrol; ôfl. The Canary Kid, Inc.
1960	Gunsmoke	Emil	gastrol; ôfl. The Blacksmith
1960	Route 66	Thad Skinner	pilotôflevering: Black November
1960	Peter Gunn	Karl	gastrol; ôfl. The Crossbow
1960	Sugarfoot	Ross Kuhn	gastrol; ôfl. Funeral at Forty Mile
1960	Shotgun Slade	Tex	gastrol; ôfl. The Spanish Box
1960	Laramie	trewant fan Gallagher	gastrol; ôfl. Duel at Alta Mesa
1960	Have Gun – Will Travel	Tarnitzer	gastrol; ôfl. The Legacy
1960	Maverick	helpsheriff Jones	gastrol; ôfl. Hadley's Hunters
1960	Lawman	Burt	gastrol; ôfl. To Capture the West
1960	Have Gun – Will Travel	luitenant John Bryson	gastrol; ôfl. A Head of Hair
1961	Bat Masterson	sheriff Zeke Armitage	gastrol; ôfl. The Fourth Man
1961	Have Gun – Will Travel	Preston	gastrol; ôfl. The Road
1961	Gunsmoke	Pat Swooner	gastrol; ôfl. Big Man
1961	Have Gun – Will Travel	Deke	gastrol; ôfl. The Vigil
1961	The Untouchables	Birdie	gastrol; ôfl. The King of Champagne
1961	Have Gun – Will Travel	Rud Saxon	gastrol; ôfl. A Proof of Life
1961	Gunslinger	sheriff	gastrol; ôfl. The Buried People
1961	Bonanza	Peter Long	gastrol; ôfl. The Infernal Machine
1961	Have Gun – Will Travel	frater Grace	gastrol; ôfl. Squatter's Rights
1961	Gunsmoke	Jake Bayloe	gastrol; ôfl. Kitty Shot
1962	The Tall Man	Hyram Killgore	gastrol; ôfl. One for All
1962	Rawhide	George Wales	gastrol; ôfl. The Peddler
1962	Gunsmoke	Hug	gastrol; ôfl. The Boys
1962	Have Gun – Will Travel	Big John	gastrol; ôfl. Don't Shoot the Piano Player
1962	Going My Way	Mike	gastrol; ôfl. A Man for Mary
1962	Death Valley Days	Steamboat Sully	gastrol; ôfl. Miracle at Whiskey Gulch
1962	Outlaws	Joe Ferris	gastrol; ôfl. Farewell Performance
1963	The Andy Griffith Show	resjersjeur fan 'e steatsplysje	gastrol; ôfl. The Big House
1963	Have Gun – Will Travel	frater Grace	gastrol; ôfl. The Eve of St. Elmo
1963	Dr. Kildare	Joe Cramer	gastrol; ôfl. To Each His Own Prison
1963	Perry Mason	George Spangler	gastrol; ôfl. The Case of the Greek Goddess
1963	The Travels of Jaimie McPheeters	Angus	gastrol; ôfl. The Day of the Long Night
1963–1964	McHale's Navy	Big Frenchy	weromkearende rol; 2 ôfl. (French Leave for McHale en The Return of Big Frenchy)
1964	Gunsmoke	Cyrus	gastrol; ôfl. Crooked Mile
1964	Bonanza	Waldo Watson	gastrol; ôfl. The Scapegoat
1964	The Virginian	Jack Marshman	gastrol; ôfl. A Gallows for Sam Horn
1964	Gunsmoke	Warden Stryker	gastrol; ôfl. The Warden
1965	Daniel Boone	Zach Morgan	gastrol; ôfl. A Rope for Mingo
1965	Laredo	Jess Moran	gastrol; ôfl. Pride of the Rangers
1965	The Virginian	Tom "Bear" Suchette	gastrol; ôfl. Nobility of Kings
1965	A Man Called Shenandoah	Mitchell Canady	gastrol; ôfl. A Special Talent for Killing
1966	Gunsmoke	Ben Payson	gastrol; ôfl. Harvest
1966	The Legend of Jesse James	Blodgett	gastrol; ôfl. Return to Lawrence
1966	Dr. Kildare	brigadier Hensley	weromkearende rol; 2 ôfl. (Mercy or Murder en Strange Sort of Accident)
1966	The Virginian	Huck Harkness	gastrol; ôfl. The Trail to Ashley Mountain
1966	The Big Valley	Jack Thatcher	gastrol; ôfl. Barbary Red
1967	Tarzan	Crandell	gastrol; ôfl. Thief Catcher
1971	Ironside	pastoar Samuel Patrick "Sarge" Cavanaugh	gastrol; ôfl. The Priest Killer, tagelyk ek de pilotôfl. foar de spin-offsearje Sarge
1971	Sarge	pastoar Samuel Patrick "Sarge" Cavenaugh	fêste rol; 16 ôfl.
1974	A Cry in the Wilderness	Sam Hadley	tillefyzjefilm
1975	The Blue Knight	Bumper Morgan	fêste rol; 24 ôfl.
1979	Backstairs at the White House	presidint fan 'e Feriene Steaten Warren G. Harding	gastrol; ôfl. #1.2
1981	Saturday Night Live	himsels	as presintator; ôfl. George Kennedy/Miles Davis
1983	Fantasy Island	Adam Cobb	gastrol; ôfl. God Child/Curtain Call
1986	Benson	himsels	gastrol; dûbele ôfl. Reel Murder (diel 1 en 2)
1988–1991	Dallas	Carter McKay	fêste rol; 67 ôfl.
1994	Lonesome Dove	rjochter J.T. "Rope" Calder	minysearje; ôfl. Judgement Day
1995	The Commish	Al Scali	gastrol; ôfl. The Golden Years
1995	The Gambler Part III: The Legend Continues	generaal Nelson A. Miles	minysearje
1996	Wings	himsels	gastrol; ôfl. What About Larry?
1996	The Real Adventures of Jonny Quest	generaal Axton	gastrol; ôfl. DNA Doomsday
1996	Dallas: J.R. Returns	Carter McKay	tillefyzjefilm
1998	Dallas: War of the Ewings	Carter McKay	tillefyzjefilm
2003	The Young and the Restless	Albert Miller	weromkearende rol; ôfl. #1.7762, #1.7763 en #1.7764
2004	The Complete History of U.S. Wars 1700–2004	himsels	as presintator fan in dokumintêresearje; 8 ôfl.
2010	The Young and the Restless	geast fan Albert Miller	gastrol; ôfl. #1.9553
films
1960	The Crowded Sky	plysjeman	net fermeld op 'e ôftiteling
1961	The Little Shepherd of Kingdom Come	Nathan Dillon
1962	Lonely Are the Brave	helpsheriff Gutierrez
1962	The Silent Witness	Gus Jordan
1963	The Man from the Diners' Club	George
1963	Charade	Herman Scobie
1964	Strait-Jacket	Leo Krause
1964	McHale's Navy	Henri Le Clerc
1964	Island of the Blue Dolphins	Aleoetyske haadman
1964	Hush... Hush, Sweet Charlotte	Foreman
1965	In Harm's Way	kolonel Gregory
1965	Mirage	Willard
1965	Shenandoah	kolonel Fairchild
1965	The Sons of Katie Elder	Curley
1965	The Flight of the Phoenix	Mike Bellamy
1967	Hurry Sundown	sheriff Coombs
1967	The Dirty Dozen	majoar Max Armbruster
1967	Cool Hand Luke	Dragline	Oscar foar bêste byrol fan in akteur nom. Golden Globe foar bêste byrol fan in akteur
1967	The Ballad of Josie	Arch Ogden
1968	Bandolero!	sheriff July Johnson
1968	The Pink Jungle	Sammy Ryderbeit
1968	The Legend of Lylah Clare	Matt Burke	net fermeld op 'e ôftiteling
1968	The Boston Strangler	resjersjeur Phil DiNatale
1969	Guns of the Magnificent Seven	Chris Adams	ek bekend as The Magnificent Seven 3
1969	The Good Guys and the Bad Guys	Big John McKay
1969	Gaily, Gaily	Axel P. Johanson	yn dielen fan Jeropa útbrocht as Chicago, Chicago
1970	...tick...tick...tick...	John Little
1970	Airport	Joe Patroni	nom. Golden Globe foar bêste byrol fan in akteur
1970	Zig Zag	Paul R. Cameron	ek bekend as False Witness
1970	Dirty Dingus Magee	Herkimer "Hoke" Birdsill
1971	Fools' Parade	Dallas "Doc" Council	ek bekend as Dynamite Man from Glory Jail
1973	Lost Horizon	Sam Cornelius
1973	Cahill, U.S. Marshal	Abe Fraser
1974	Thunderbolt and Lightfoot	Red Leary
1974	Airport 1975	Joe Patroni
1974	Earthquake	brigadier Lew Slade
1975	The Eiger Sanction	Ben Bowman
1975	The "Human" Factor	John Kinsdale
1977	Airport '77	Joe Patroni
1977	Ningen no Shōmei	Ken Shuftan	Japanske film; de titel betsjut "Bewiis fan 'e Man"
1978	Mean Dog Blues	haadynspekteur Omar Kinsman
1978	Death on the Nile	Andrew Pennington
1978	Brass Target	generaal George S. Patton
1979	Search and Destroy	Anthony Fusqua
1979	The Double McGuffin	kommissaris Talasek
1979	Steel	Big Lew Cassidy
1979	The Concorde ... Airport '79	Joe Patroni
1980	Death Ship	kaptein Ashland
1980	Virus	admiraal Conway	Japanske produksje; Japanske titel: Fukkatsu no Hi = "Dei fan 'e Weropstanning"
1980	Hotwire	Farley en Harley Fontenot
1981	Just Before Dawn	Roy McLean
1981	Modern Romance	himsels / Zoron
1981	The Archer: Fugitive from the Empire	Brakus
1982	Wacko	Doctor Graves
1982	The Jupiter Menace	himsels	dokumintêre
1984	Chattanooga Choo Choo	Bert
1984	A Rare Breed	Nathan Hill
1984	Bolero	Cotton
1984	Rigged	Ben
1985	Radioactive Dreams	Spade Chandler
1985	Savage Dawn	Tick Rand
1986	The Delta Force	pastoar O'Malley
1987	Creepshow 2	Ray Spruce
1987	The Gunfighters	Deke Turner
1988	Born to Race	Vincent Duplain
1988	Counterforce	Vince Colby
1988	Demonwarp	Bill Crafton
1988	Nightmare at Noon	sheriff Hanks
1988	Top Line	Heinrich Holzmann	Italjaanske film; yn 'e Feriene Steaten útbrocht as Alien Terminator
1988	Uninvited	Mike Harvey
1988	The Naked Gun: From the Files of Police Squad!	haadynspekteur Ed Hocken
1989	The Terror Within	Hal
1989	Ministry of Vengeance	dûmny Hughes
1989	Esmeralda Bay	Wilson
1990	Brain Dead	Vance
1990	Hired to Kill	Thomas
1990	Mayumi	Bachreinske resjersjeur	Súdkoreaanske film; ek bekend as Mayumi: The Virgin Terrorist
1991	Hangfire	Warden E. Barles
1991	Driving Me Crazy	John McCready
1991	The Naked Gun 2½: The Smell of Fear	haadynspekteur Ed Hocken
1991	Intensive Care	dokter Bruckner	Nederlânske film
1992	Final Shot: The Hank Gathers Story	pastoar Dave
1992	Distant Justice	Tom Bradfield
1994	Naked Gun 33⅓: The Final Insult	haadynspekteur Ed Hocken
1994	River of Stone	ûnbekend
1997	Cats Don't Dance	L.B. Mammoth	as stimakteur
1997	Bayou Ghost	plysjeman Lowe
1998	Small Soldiers	Brick Bazooka	as stimakteur
1998	Dennis the Menace Strikes Again	pake Johnson
2003	View from the Top	passazjier dy't om wodka freget	cameo; net fermeld op 'e ôftiteling
2005	Three Bad Men	Ed Fiske
2005	Truce	dokter Peter Gannon
2005	Don't Come Knocking	regisseur
2007	Sands of Oblivion	John Tevis
2008	The Man Who Came Back	rjochter Duke
2010	Six Days in Paradise	Monty Crenshaw
2010	Mad Mad Wagon Party	J.B. Scotch
2011	Another Happy Day	Joe Baker
2014	The Gambler	Ed

Bibliografy

• 1983 – Murder on Location (misdieroman)
• 1984 – Murder on High (misdieroman)
• 2011 – Trust Me (autobiografy)

Keppelings om utens

• (in) Folsleine filmografy fan George Kennedy yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory George Kennedy fan Wikimedia Commons.