ءيا، قۇلىنشاق، كەيدە شەشەڭ ساعان وتە قاتاڭ تالاپ قوياتىنى بار،اسىرەسە ۇيىرەنۋگە قاتىستى ءار شارۋانى قاتاڭ قاداعالاپ، سەنى شارشاتىپ، جالىقتىرىپ تا الامىن. ال كەيدە، سەن دە مەنى تەبىرەندىرەسىڭ، اكەڭ ەكەۋىمىزدە جۇمىسقا كەتەمىز، ۇيدە كوبىندە جالعىز وتىراسىڭ، وتكەندە، قارلى بوراندا، ەكى ساعات بويى وشىرەتتە تۇرىپ، ءوزىڭ ۋاكسينا سالدىرىپ كەلگەنىڭدە تەبىرەنگەنىم سونشا، ءبىر جاعى اقىلدى بوپ، ەس كىرگەنىڭە قۋانسام، ءبىر جاعى بوراندا، قاسىڭدا بولا الماعانىما ىشتەي قىسىلامىن. قالايدا، ۇل بالا بولعاسىن، قيىندىقتارعا ءتوزىمدى بولسا ەكەن دەيمىن-اۋ؟!

    وتكەندە، «مەنىڭ شەشەم دۇنيەدەگى ەڭ ۇلى شەشە» دەپ قوياسىڭ، ءسابي كوڭىلىڭنەن اينالدىم، شەشەڭ، ەڭ ارينە، دۇنيەدەگى ەڭ جاقسى جان ەمەس، ءبىراق سەن ءۇشىن بار ىنتا پەيلىمەن قۇلشىنىپ كەلەدى. سەنىڭ سول ءسوزىڭدى ەستىگەندە جۇرەگىم ەلجىراپ كەتكەنى، تەك كينولاردان، كىتاپتاردان عانا ەستيتىن كوركەم ءسوزدى ەستىپ تۇرعاندايمىن.

    ءيا، شەشەڭ دە كەيدە، شىرپىداي ءالجۋاز -اۋ، شارشاپ تا قالاتىن شاعىم بار، ءوزىمدى ءتوزىمدى بولۋعا قانشاما باۋلىسام دا، توزبەي قالارءبىر ساتتەرىم بار. مۇمكىن ەل ونى كەمشىلىككە بالار، مەيلى. اسىرەسە، وسى ون جىلدان بەرگى، نەگىزگى ساتى قىزمەتى، جەرشارىلىق ىندەتپەن الىسۋ بارىستارى دا كوپپەن بىرگە شەشەڭە دە ‹‹ە، بىزدە تالايدى كوردىك قوي›› دەگىزگەندەي. كەي ساتتە، تۇرمىستا، ومىردە كەزىككەن ءار ءبىر ىستەرگە ءوزىنىڭ ىشكى دۇنيەسىمەن توتەپ، ءوز-وزىنە ارقا سۇيەپ، ءوز-ءوزىن كەشىرىپ، ءوز-ءوزىن ايالاي قۇشاقتاپ، قاتتى قىسا تۇسكەندەي بولادى. وزىنە-ءوزى دەم بەرىپ كەلەدى. ءيا، ۇلىم كەيدە ساعان دا شەشەڭ، بالام مەنى قۇشاقتاپ قويشى دەيتىنى سول، سەنىڭ كىرشىكسىز، پاك، بىتتەي قۇشاعىڭ دا شەشەڭنىڭ بار اۋىرتپالىعىن ۇمىتتىرىپ، جەڭىلدەتىپ جىبەرەدى.

    قۇلىنشاق، سەن شەشەڭە، «انا» دەگەن ۇلى جاۋپكەرشىلىكتى ارقالاتتىڭ، اتا-انالىق بورىشتى سەزىندىردىڭ، «بارعا شۇكىرلىك» دەگەن ۇعىم بار بىزدە، ول مۇمكىن، ءومىردى، تۇرمىستى، ادامدى دا سول قالپىندا قابىلداۋ شىعار دەيمىن، جانە ومىردەگى «ءبىر كەم دۇنيەگە» سابىر ەتۋ شىعار، بالامنىڭ ەمتيحاننان قانشا الۋىمەن ساناسپايمىن دەيدى دوسىم، ونىڭ سول سابىرى مەن كەڭپەيلىدىلىگى ۇنايدى. قانشاما ساۋاتسىز انالار بار، ولار ءارىپ تانىماعانىمەن، ءوزىنىڭ ساباز مىنەزىمەن، اقىل-پاراساتىمەن تالاي ۇلاعاتتى ۇرپاق تاربيەلەمەدى مە؟!

    شەشەڭ دە كەيدە مىنسىزدىككە ۇمتىلاتىنى بار، ول عوي ادامدى قۇلشىنۋعا جەبەيتىنى راس، ءبىراق، تىم شارشاتادى-اۋ، اسىرەسە، ادام پەندەسى ءوزى سۇيەتىن جاقىن جاناشىر جانداردىڭ تەك باقىتتى، الاڭسىز، عۇمىر كەشۋىن ارماندايدى، كەيدە جاقىن جانداردىڭ جانىنا باتقان قايعى دا شەشەڭنىڭ جۇرەگىن تىلگەپ، تەرەڭ ءبىر تۇڭعىيىققا باتىرادى. ءتىپتى ولار ءۇشىن نە ىستەپ بەرسەم ەكەن دەپ، ۇزاقتى تاڭعا كوز ىلمەيتىنى بار. ال تۋىستىڭ بولماشى جاقسىلىعى دا جانىن جادىراتادى. كەيدە، شىركىن، ادام بىتكەن تەك باقىت جايلى اڭگىمە ايتسا عوي، مەن تەك تامسانا تىڭداپ، تولقي باس يزەسەم دەيدى-اۋ، ءتىپتى ءوزى وقىعان الدەءبىر اڭگىمەدەگى كەيىپكەردىڭ باقىتتى بولۋمەن شىعارمانىڭ شەشىم تابۋىنىڭ ءوزى شەشەڭدى قانشالىق شاتتاندىراتىنىن بىلسەڭ عوي، قۇلىنىم.

    شەشەڭ كەيدە، ادامدار-اۋ، تەك باقىت جايلى ايتىڭدارشى دەپ ايقاي سالعىسى كەلەدى، قايدان، كوڭىلى تىنعان سۋداي تىنىشتالعان ءبىر ءساتتى كۇتكەن سايىن، سول ءسات كەيدە شەشەڭنەن جالت ەتىپ قاشاتىنداي ما؟

ء    يا، قۇلىنشاعىم، وتكەندە ماتەريالدان، بۇرىن اعايىندى كەننەديلەردىڭ اناسى تاڭەرتەڭ بالالارىن ”گراف، تۇرىڭىز، ءسىزدى ۇلى ىستەر كۇتىپ تۇر“ دەپ وياتادى ەكەن، سول ەكى ازامات تا، ا ق ش -تىڭ لايىقتى ۇلدارى بولدى، بىرەۋى پرەزيدەنت، بىرەۋى سەناتور بولىپتى دەگەن ماتەريالدى كورگەنى بار، مىنە، اجەلەرىمىز ايتاتىن جاقسى ءسوز جارتى باقىت دەگەنى سول عوي، يا، شەشەڭنىڭ ەسىنە تاعى دا اۋىلداعى اڭگىمەلەر تۇسە كەتتى، قيىندىق پا، اشۋ ما الدە، شىدامسىزدىق پا ايتەۋ، بالالارى جايلى ىلعي دا ‹‹بوتەن››پىكىردە جۇرەتىن انالار دا كەزەسىپ قالادى. ولار بەينە، ءومىردىڭ، تاعدىرىنىڭ قيىندىعىن سول بالالارى بار بولعاندىقتان عانا كورىپ وتىرعانداي بولادى-اۋ، ىلعي دا ءۇمتسىز لەبىز، ءبىر رۋلى ەلدىڭ، ءتىپتى، ءبىر ۇلىستىڭ، ۇلتتىڭ تاعدىرى اقىلگوي ايەلدەرمەن قۇندى ەكەنىن تاريح الدە قاشان دالەلدەپ كەتكەن ەمەسپە؟! اسىل اجەلەرىمىزدىڭ تۋعان ايعادا، شىققان كۇنگە قۋانا قاراپ، سالەم جاساپ، العىس بىلدىرەتىنىن ۇمىتىپ قالدىق؟ ءبىز بۇگىندەرى تىم كوپ نارسەنى اڭساپ، تىم كوپ نارسەگە قول جەتكىزۋگە تىم اسىعىپ كەتكەن جوقپىز با؟ سوسىن دا العىس ايتۋ، جاقسىلىقتى، سۇلۋلىقتى سەزىنۋ، ومىرگە ۇمىتكەرلىك كەمشىن...

    كەيدە كەرەمەتتەي ۇرپاقتار كورگەندە اناسىنا قارايمىن، اناسى نە ىستەپ جۇر؟ ! ەڭبەكشىل مە ەكەن، سابىرلى ما؟ ءتوزىمدى مە؟ اۋزىنان اقىق مارجانداي اسىل سوزدەر توگىپ تۇر ما؟ الدە جۇرەگى تازا، كوپشىل شىعار؟ جاۋاپكەرشىلىك دەگەندى تەرەڭىنەن ۇعىناتىن جان-اۋ دەيمىن. ول مۇمكىن قيىنشىلىقتى جەڭگەن جان شىعار، تۇماندى جىلداردىڭ توزاڭىن تىنشىماستان سۇرتىپ، كوركەم عۇمىر جاراتا بىلگەن دانا شىعار دەيدى، ىشتەي.

    مىنە قۇلىنشاق، ءبىز بىرگە جارىس كورىپ وتىرمىز، احپاراتتاردان كاتار ەلى باي دەگەندى سەن دە ءبىلىپ اپسىڭ؟ ءبىرىنشى مايدان جارىس تا باستالدى، سوڭى كاتاردىڭ جەڭىلۋىمەن تىندىم بولدى، بۇل كوپتەگەن دوپقۇمارلاردى ۇمىتسىزدەندىرىپ قويعانداي ما قالاي؟ اسىرەسە، ناق مايداندا دوپ كورىپ، وتىرعانداردان الدىن الا دوپ مايداننان كەتىپ جاتقانداردا بايقالادى، شىنايى جانكۇيەر جەڭىلستە بىرگە جىلامايما دەيمىز؟ ءيا، بۇل بىزگە، اقشامەن بايلىق بولسا عانا ءبارى بولا بەرمەيتىنىن ۇعىندىراتىنداي، قىرۋار اقشا شىعارىپ، وسى الەمدىك الا دوپ دوداسى ءۇشىن ارنايى قالا سالىپ، بار ىنتا پەيىلىمەن دۇنيەنىڭ جەر -جەرىنەن كەلىپ جاتقان قوناقتاردى قابىلداعان وتاعاسى ەلدىڭ جەڭىلۋى راسىندا جۇرەكتى اۋىرتادى ەكەن.

    ءيا، ءومىر دە كەيدە سول جازا دوبىن قاقپاعا بار ىنتاڭمەن تەپكەلى تۇرعان بەينەگە ۇقسايدى، ەندى نە ءىس تۋىلاتىنىن سەن ماڭگى بىلمەيسىڭ، ءبىراق، ءبىزدىڭ ىستەي الاتنىمىز تەك بار كۇشپەن قۇلشىنۋ، ادام باتىلدىقپەن ارمانداۋ كەرەك، رەالدىقتىڭ شەكتەمەسىن ۇمىتا وتىرىپ، ارمانداۋى ءتيىس تە، ومىردە جەڭىس ءبىر ساتتىك عانا، سوعان جەتۋ جولىنداعى جەڭىلىستەر بىزگە ىلەسە جۇرەتىنءتارىزدى. ەڭ ماڭىزدىسى، سول ساتسىزدىككە ۇشىراعانداعى پوزەتسياڭ. قايتا تۇرىپ، ءتىپتى دەجىگەرلەندىڭ بە جوق، كۇيىرەپ كەتتىڭ بە ەكەن دەيدى، ءومىر سەنىڭ سول ءبىرتالعامىڭا بايلانىستى سىپەتتى!

    ءيا، قۇلىنشاق، دوپ تا دوڭگەلەڭ، جەر شارى دا دوڭگەلەك قوي، دوڭگەلەنگەن دۇنيە-اي دەپ اپالارىمىز اندەتەتىنى بار، جارىس مايدانىندا ءارقانداي ءبىر ىستەر تۋىلۋى مۇمكىن، ءتىپتى ەڭ سوڭعى ءبىر سەكۋنت بولسادا، ول جەڭىلىس پەن جەڭىستى بەلگىلەيدى. دۇنيەدەگى ەڭ ءبىرىنشى سپورت سانالعان فۋتبۋلدىڭ تارتىمدىلىعى دا سوندا، ادام ءومىرى دە وسىلاي، تۇرمىستا مۇقيات، قىزمەتتە كوڭىلدى بولساق، ارمان -مۇراتتى الاسارتپاي، ءارءساتتىڭ قادرىن بىلسەك، ءبارى دە بولۋى مۇمكىن، تەك قۇلشىنا بىلسەك، ءباز كەشپەسەك، كەلەر باقىت اداسپاي-اق ءبىزدى تاباتىنى مۇندا.

    بالا كەزىم تۋرالى كوپ سۇرايتىنىڭ بار، تەڭبىل دوپ دوداسى جايىندا، ءبىز بالا كەزدە راديودان ەستىپ قالاتىنبىز، كەيىن تولىقسىزدا، تولىق ورتادا ۇستازداردان ەستىدىك، ۋنيۋەرسيتەتتە دە ساباقتاستارمەن بىرگە دوپ جارىسىن تاماشالاپ ەك. مىنە ەندى ءوز ۇيىمدە ۇلىممەن بىرگە دوپ جارىسىن تىكە بەرىلىمنەن كورىپ وتىرمىن، اكەڭ دە، دوپ كورىپ وتىرعانىمىزعا ءماز! كەيدە، توراپتان باسقادا ماتەريالدار ىزدەپ، ءار ەلدىڭ جاعدايىنان، كىليماتىنان، فۋتبۋل شولپاندارىنىڭ حيكايالارىنان جانىما شۋاق العاندايمىن. مۇنىڭ ءوزى كەرەمەت ەمەسپە؟ دوپ شولپانداردىڭ عۇمىرى دا جىعىلا جۇرىپ، جىلاي جۇرىپ شىڭعا ۇمتىلعانداي اسەرلى، كەيدە جارالانىپ قالسادا، قۇلشىنىستان ءبىر تانباعان عۇمىر! تاعى دا ءتورت جىل، ءتورت جىل دەپ تىنباعان عۇمىر، ولار قانشاما ءتورت جىلدارىن وسى مايدانعا شىعۋ ءۇشىن ماشىققا ارنادى، مەن بارىمدى دوپقا ارنادىم، دوپ تا ماعان ءبارىن سيلادى دەيدى، ولاردىڭ جۇرەك ءۇنىن تىڭداساڭ! ولاردىڭ سول بار ىنتاسىن سالعان شەكسىز جىگەرىنىڭ ءوزى قانشاما ادامدى شابىتتاندىردى،كۇش قۋات سيلادى دەسەڭشى.

    ءيا، قۇلىنشاق، ءار ادامنىڭ وزىنە عانا ءتان فۋتبۋل الاڭى بار، جۇگىرۋ عانا ەڭ ادەمى بەينە! قۇلىنىم، ءبىز بىرگە جۇگىرەيىكشى!